Lahja Nashuuta

Namibiab ǁHûidi ǂHôamāǂuide Mûǂams !Nurib !nâ-i ge ra !nurihe, ǁhûidi !aroma di ǂgiǂgo!nande ra ūhâ ǂnûdi ǁanǂgāsabena !hūb a ǂhabase ǂanǂans mâsib !nân ǀkharaǀkharana a mûsa !khaisa. ǂHôamāǂuidi di Ombudsmani, John Nakutab ge koasa ǂhôamāǂui!khaiga ge mā, mîb geresen ǁîna hoaǁae ǁhûi-aona ǂhôan ǀgapise ra ūhâ, ǁhûidi ǂnamipe ra !gû mâsin ǂnamipe in ǂansa ūhâ tsîn ǂhanuse ǁnâu!ā hâse tari-en nî ǁhûiba !khais tsî mâ 1aromas !aromas mîǁguiba ū. Nausab gere mîs ge, !nāsa ǁaxasin ǂgiǂgo!nandi din ge a ǀoroa!nâ !khaisa. 

Christie Keulderi, danase nē projeks ai Ombudsman Beros !nâ ra sîsenni ge !nurib di hōǂuideb gere ǀgoragu soab ai ge mî, !gâi ai!gûs ǁhûidi ǂnamipe hâ ǂhôana mās !nâ hâsa. 

ǁÎb ge a mîs ge nē !nurib !nân !nāsase !gâi ǂhôan tsî ǁkhāǁhûi tama ǂhôana hâsa, ai!â ge hâ i !nurib, !nāsase !gâi tama ǂhôana ge !khōǂgā hâ ib ǀkha i kara ǀgoweǀnōhe o. Keulderi gere mîs ge, Swapos tsî PDMs hâra ǀguira ǂoa tsî di nau ǂgiǂgo!nande ǀgui ǀgaub ai ǀgui ǁaxasina dīs !nâ mâsa tsîs nēsa ǀasa ǂâiǂuisa ǀgauga ǂgâxa-ūsa !hâumâi hâsa. 

ǂHâbasasib ge hâ, ǂgiǂgo!nandi nî ǁîdi dīǀgaub ǁhûi-aona harebasens diba ǂgaekhâi tsî ǂnûdi tsî ǁaxasina harase ǂhôamāǂui!khain ǀkha ǀgoragusa in nēs !nâ-ū ǂhâbasa ǂhôamāǂuisa !khō!oa.  

New Erab ge ǀgūǁ-ae Rally for Democracy and Progress (RDP) di  presidenti, Mike Kavekatoraba xu gere ǂan ǂgao, tare-i !aromas nē ǂgiǂgo!nansa ǁhûi-aona harebasens ǂnûna ūhâ tama hâsa.  Sâuǁkhāsi ǂansabe tsî a ǂgiǂgos mâisab ge nēs ai !eream tsî ge mî “Sida ge ǀgam dana ǁgoaǂuira !nans ase ūhâ. ǀGuis ge marisi ǁgoaǂuisa. 

Sida ge ǂkhari ǂgiǂgo!nans ase marisa ūhâ tama hâ. Marisi !nubusib ge ra !aroma sida ǂgiǂgosi mûǂuigu tsî ǁkhoreba da ǂhaitsise, aiǁgauses Swapo !nans tamas ka io PDMsa ra dīse a māǂui ǁoa !khaisa, ǁîra !nāsa !gôagu ǂnû-khaeba-aona parlements !nâ ūhâse. 

ǁÎs hîa da sida mâsib !naka a dī ǁkhās ge omsa-xu-oms -ǁga hâ saride da ra sîsenū tamas ka i o ǂhaitsi ǂhawega ra sîsenūsa”. 

ǀGūǁaen ge !kharaga ǂansabena ǂgiǂgo!nandi dīǀgaugu ǁhûi-aon ai ǁamaxūsens digu !gāsa ǁguiǂuiga ūhâ tama hâsa gere mî. ǂGiǂgo!nandi ge gere hōhōhe in !gāsase ǂoaxa-ūsen, aiǁgause tarits a !khais, tarenats nî ǂgâxa-ūs tsî mâ ǀgaub ais sa haisisa !gāsase nî -ǁnâu!āhes ǂnamipe.