OHAKWEENYANGA – Kakukutu komatanga gopolisi kwa li Sebastian Ndeitunga okwa gandja omahekeleko molweso lyakuume ke Solomon ‘Jesus’ Hawala, ta ti okwa si a dhimbiwa nonando a kondjele emanguluko lyoshilongo shika.
Hawala okwa hulitha Omaandaha mepipi lyomimvo 89 moshipangelo konooli.
Moonkundathana noshifokundaneki shika, Ndeitunga okwa ti oya li ya tsakanene tango momumvo 1975 sho ya li koWambu omanga inaaya ya pamwe kOndjiva koAngola nosheendo shaakwiita yoPLAN.
“Okwa li gumwe gomwaamboka kwa li twa landula ethimbo lyekondjelomanguluko, oshoka oye kwa li omeho nomakutsi goPLAN. Otwa kanitha ependafule, omulumentu ngoka i iyambele oshilongo shika opo shi mone emanguluko,” Ndeitunga ta popi ngaaka.
Ta ti, Hawala okwa li omulumentu ka tila sha.
Omupresidente gwoshilongo Netumbo Nandi-Ndaitwah okwa gandja omahekeleko kaakwanezimo osho wo koshigwana omolwezepo lyaHawala.
“Hawala okwa li omukwiita nokwa dhana onkandangala onene mekondjelomanguluko lyaNamibia. Okwa kala omukwatelikomeho goPLAN,” ta ti ngaaka.
Nandi-Ndaitwah okwa ti momumvo 2000, Hawala okwa li u ulikwa onga kakukutu komanga getanga lyegameno, sigo 2006.
Omwana gwomumati Taapopi Hawala okwa dhimbulukwa he ongomulumentu gomatumbulo omafupi ihe ayihe ohe yi gwanitha po.
“Okwe tu putudhila omikalo, nonando ka li he tu dhenge komalutu, ngele twe mu tala koshipala she, out shi shi nale kutya ope na sha shimwe kaashi li mondjila,” ta popi ngaaka.
Ta ti he okwa li e hole uunafaalama nuunamapya, nethimbo olindji sho a li a yi moshipundi shevululuko okwa li ha kala unene kofaalama ye.
Taapopi okwa ti he okwa li omuyogoki, ka li e hole oongaga, naasho a li a ningwa mwene gwomukunda Ohakweenyanga okwa li ha longekidha omasiku gokoopaleka omukunda.
Hawala okwa thigi ko omukulukadhi gwe Laimi Hawala osho wo aanona yahamano.