ONAMBUTU – Omuprsidente Netumbo Nandi-Ndaitwah okwa tanga nakufya omukondjelimanguluko Kanana Hishoono ta ti okwa li omulumenhu a longa noudiidini nokwa dana onghandangala yakula pefimbo loita okukondjela emanguluko loshilongo.
Hishoono okwa xulifa oshivike sha dja mo koshipangelo shopaumwene shaNdangwa.
Okwa xulifa mepupi lomido 89.
Ota lilwa koshuimbo shaye komukunda Onambutu moshitukulwa shaHangwena.
Oshiwana osha ngudumana keumbo laye tashi lili Hishoono.
Oshivike sha dja ko omupresidente omutivali Hifikepunye Pohamba okwa li naye a fika koshitondoka okuhekeleka ofamili.
Omupresidente okwa ti Hishoono okwa longa oshilonga shiwa moshiwana unene tuu mongudu yoSwapo osho yo okukala omuyandjimayelele kovapresidente moipambele ya nyika opolitika.
Ngoloneya woshitukulwa shaHangwena Kadiva Hamutumwa okwa ti Hishoono okwa fiya po oshihopaenenwa shiwa sha pumbwa okulandulwa
kovanyasha. “Otwa kanifa ependafule, omulumenhu kwa li e na oshisho nOvanamibia aveshe shaashi okwa li mekondjelomanguluko ta kondjele Namibia opo a kale a manguluka,” ta ti.
Ou a li nale omukaleliposhilongo waNamibia koChina, Elia Kaiyamo okwa ti Hishoono okwe va longa shihapu ngeenge tashi ya papolitika osho yo okuwilika.
“Otwa kanifa omukulu wetu, omulumenhu kwa li e na elandulafano. Otwe lihonga mo shihapu muye,” ta ti.
Omukondjelimanguluko Katrina Liswani okwa ti ova shakena naHishoono koAngola pefimbo loita omo va kala ve na ekwatafano liwa nelongelokumwe.
“Okwa kala e tu kwetela komesho te tu pe omayele. Hishoono okwa li omulumenhu e hole oukumwe nelandulafano,” ta ti.
Oshiveli shaye sheedula 70, Hilya Hishoono okwa ti xe okwa li omulumenhu ehe na okatongo shaashi meumbo lavo omwa tekulwa ounona vahapu.
“Tate okwa li a fimaneka ehongo shaashi okwe tu tuma kofikola. Tate okwa li e hole ombili nokukala te tu lombwele opo tu kale tu lihole,”ta ti.
Hishoono okwa fiya po omukulukadi waye nounona vaye vahetatu.
Omalongekido oshivilopako shaHishoono oku li metifa.
