Ombelewa yomupilimaminista oya ti oya tegelela olopota yi ihwa po okuza kopolisi osho wo koombelewa dhoshitopolwa ngele oondooha dhoohi ndhoka dha adhika dha fumvikwa moshitopolwa shOtjozondjopa odhoshikukuta tuu shili. 

Otaku hokololwa kutya oondooha dhoohi inaadhi shiwika natango kutya odhi li ngapi odha adhika dha fumvikwa popepi nOtavi. 

Omupopiliko mombelewa yOmupilimaminista Maxmus Halwoodi okwa ti onkundana oya thika mombelewa yawo ihe oya tegelela uuyelele wi ihwa po okuza koshitopolwa. 

“Otwa tegelela opolisi osho wo aanambelewa ya mone uuyelele wothaathaa ngele oondooha ndhoka odhoshikukuta ngaa shili nodhi li ngapi,” ta popi ngaaka. 

Ta ti ngele ya mono uuyelele otaya tseyithile oshigwana. 

Halwoodi okwa ti iikulya yoshikukuta kayi shi yaantu mboka yi ihole, ihe oya nuninwa aantu ye li shili mompumbwe yiikulya. 

Okwa kumagidha wo oshigwana shi hulithe po okuyaka iikulya ya nuninwa mboka ye li mompumbwe shili. 

“Iikulya kayi shi yokulandithwa po. Mboka ye li metonatelo lyayo naya kale ye na oshinakugwanithwa nokukwashilipaleka kutya oya gandjwa kwaamboka ye yi pumbwa,” ta kumagidha ngaaka. 

Oomwedhi dha zi ko opolisi moshitopolwa shaKavango East oya kwata ko uusila woshikukuta wa adhika anuwa tau landithwa kaafekelwa yaali momukunda Shaka Mbumba popepi noRundu. 

Shaikolelela kopolisi oshiningwanima shoka anuwa osha holoka momundhingoloko gwaRundu. 

Otaku fekelwa kutya iikulya mbyoka yoshikukuta oya li yi na okutopolelwa aantu ye li mompumbwe. 

Opolisi moshitopolwa shaShikoto nayo oya li ya lopota iikulya yoshikukuta ya yakwa, yongushu inaayi tseyika. 

Miikulya moka anuwa omwa li mwa kwatelwa ooshako dhuusila wepungu, iipakete yomagadhi gokulya, osho wo iipakete yoohi dhomoondooha. 

Natango nuumvo kOshivelo okwa li kwa kwatwa ooshako dhuusila wepungu dho 26kg dhi li 34, iipakete iyali yomagadhi gokuteleka, iipakete iheyali yoohi dhomondooha, nooshako mbali dhomakunde omatiligane, nongushu yiinima mbika N$100 000. -vkaapanda@nepc.com.na