Iilyo yoNetwork yili 240 otayi ka kutwa mopolisi

Iilyo yoNetwork yili 240 otayi ka kutwa mopolisi

Kakutu komatanga gopolisi yaNamibia Joseph Shikongo okwa ti, molweetho lwokukuta aapolisi lwalandula ko otamu ka kwatelwa iilyo yelyenge lyaakiintu naalumentu mboka hayi iyamba mokulwitha iimbuluma. Shikongo okwa popi ngaaka oshiwike sha ziko sho kwali ta pandula aanambelewa yopolisi moshitopolwa shaZambezi omolwa ondjele yiimbuluma yashuna pevi, netompelo lyomayambindhindho gaaiyambi yeli mongundu tayi ithanwa “Women and Men network”. 

“Ota tu ka kutha aayiyambi yathika po240 oshilongo ashihe, kehe moshitopolwa otamu ka za aantu yeli omulongo. Olweetho lwa ziko okwali twa kutha aantu yatano kehe moshitopolwa,” ta yelitha ngaaka. 

Omumvo gwa ziko Shikongo natango okwali a yelayela aapolisi moshilongo ashihe omolwa iilongo iiwanawa taya longo okulwitha nokushunitha iimbuluma pevi.

Ta ti, ohashi pula eitulemo nuuyuuki wa kola opo omupolisi a gwanithe po iilonga ye yi li ngaashi yi na okulongwa onkene oshi shi okupandulwa momukalo ngaashi nguka tagu ningwa ngeyika.

Ta kumagidha kutya aapolisi ayehe mboka ya yelwa omimvo dha zi ko okwa tegelelwa ya tsikile nokulonga neitulemo, okukala lela ye na omikalo, taya longo pambelewa okuhwepopeka egandjo lyomayakulo osho wo okulonga iilonga yawo pondondo yopombanda ngaashi taya vulu.

“Kapu na omupolisi e na okulombwela omukwashigwana ta pula ekwatho kutya kapu na iihauto yokuya kuyi ishewe opolisi nayi yamukule mbala taya longitha oonzo ndhoka dhi li po opo ya kwathele oshigwana, peha lyokugandja omaipopilo,” ta popi ngaaka. Ta kumagidha aapolisi oshilongo ashihe ya tsikile okulonga nuudhiginini nokwiikaleka ko kule nuulingilingi, oshoka oyo yena oku kala iiholelwa iiwanawa koshigwana.vkaapanda@nepc.com.na