Charles Ndeumane
Ekwatonkonga oshimbuluma hashi ningwa mehalomo, niipotha oyindji yekwatonkonga ya longelwa aanona ohashi vulika yi kale inaayi lopotwa.
Omukuluntu gwopolisi moshitopolwa shaShikoto Teopoline Kalompo-Nashikaku okwa ti opolisi moshitopolwa she oya lopotelwa iipotha oyindji yekwatokoonkondo okuza petameko lyomvula, ashike paife otayi ende tayi shonopala. Okwa ti iipotha yoludhi ndoka, mbyoka hayi ningilwa aanona ohayi ya ashike puuyelele ngele okanona ka ninga oshihakanwa oka pumbwa ekwatho lyopaunamiti. Yimwe ohayi holoka wo uuna opolisi tayi gandja elongo nomauyelele kombinga yomakwatonkonga kombinga yuuthemba womuntu.
Nashikaku okwa ti opolisi moshitoplwa shaShikoto oya koneke kutya oonakukwata onkonga oyendji aaniilonga yaAngola mboka haya litha iimuna. Okwa ti ohaya tete aanona kondjila ngele taya zi koosikola, taye ya heke nuuleke nenge niimaliwa, nenge ye ya ningile omatilitho.
Olundji aanona ihaya longwa kombinga yuuthemba wawo oshowo okukala ya manguluka okupopya mo omaiyuvo gawo. Shono ohashi eta uumbanda muyo okupopya uuna yaningilwa omiyonena dhopaihulo. Aakuluntu yaanona nakehe ngoka ha tonatele aanona yaakadhona naya kale yeli uupathi opo ya dhimbululwe uuna uunona tawu ulike omaihumbato taga limbilike oshoka otashi vulika waningilwa omiyonena dhopaihulo ashike owa tila okushipopya-Nashikaku ta ti.
Omukonaakoni gwiipotha koshitaasi kOmuthiya Warrant Jacob Wananbande okwa ti uuwindji wiipotha yekwatokoonkondo mOshikoto otawu limbilike. Ta ti e okwa ti ngele opwa piti ethimbo inaya lopotelwa oshipotha shekwatonkonga shila omasiku gaali. Wananbade uuyelele mbuka okwe gu gandja mopangulilo, yamangestrata gwaNdangwa pethimbo a li ta gandja uumbangi wunasha noshipotha moka omusamane gwomimvo 67 ta tamanekelwa ekwatonkonga lyokanona okakadhona koomvuna omugoyi. Oshipotha shino nasho oshe ya ashike puuyelele sho ofamili ya dhimbulula kutya okanona otaka ende nuudhigu, nomaihumbato gako kage li ngaashi shito, konima yiiwike iyali okuza sho okanona anuwa ka kwatwa onkonga. –mrndeumaneraycharles@gmail.com
Caption: Ekwatonkonga oshiholekwa… Iimbuluma oyindji yekwatonkonga ihayi lopotwa oshoka oonakuningwa iihakanwa ohaya kala nuumbanda.
Efano: Otwe li pewa