Aantu ye li 203 oya mangwa po sho ya adhika niingangamithi ya yooloka inaayi pitikwa moshilongo.
Sha ikolelela kuuyelele wa gandjwa kopolisi, aantu mboka ya mangwa po, omwa kwatelwa Aanamibia osho wo yamwe yokiilongo yokondje.
“Opolisi oya lopota kutya aantu ye li 192 Aanamibia, omanga yalwe mbeya aakwiilongo” tayi ti ngaaka.
Opolisi oya ti iingangamithi ayihe mbyoka oya lopotwa ya mangwa naantu momwedhi gwaApilili aguke oshilongo ashihe.
“Iingangamithi ayihe ya kwatwa ko kopolisi ongaashi Cannabis ngoka ogo ga lopotwa ga kwatwa ogendji, ge na ookilogalama 254.7 dhongushu yoomillion N$2.5, Mandrax dhi li 747 dhongushu N$90 000, uusila wococaine woogalama 51 wongushu N$25 500 osho wo okeleke yi thike po 43 yongushu N$4 300,” ya nyola ngaaka.
Opolisi oya ti, iingangamithi oyo hayi piyaganeke omadhiladhilo gomuntu opo a ka longe iiningwanima inaayi uka.
Tayi tsikile okukumagidha oshigwana shi hulithe po okulongitha iingaangamithi oshoka oya nika oshiponga.
“Kehe ngoka ta ka adhika niingangamithi ota ka pewa egeelo lye lya gwana,” opolosi ya ti ngaaka.
Otaku fekelwa aakwiilongo oyo haya yakele iingangamithi moshilongo, nonando oye shi kutya inaga pitikwa moshilongo.
Aanona oyendji oya thigi po oosikola, ya yi momapandaanda omolwiingangamithi taya longitha.
Aanyasha oya hanagulwa po kiingangamithi, neilongo kaye na nalyo, oshoka oonkalamwenyo dhawo oye dhi tula miingangamithi.
Opolisi otayi kumagidha oshigwana shi kale aluhe tashi lopota mpoka nenge ngoka ta landitha iingangamithi.
Tayi ti, aantu mboka inaya pumbwa okukala moshigwana otaya teyagula po aantu, oya
pumbwa okukala moondjendhililo.