Ngoloneya gwoshitopolwa shaShana Hofni Iipinge okwa ti, itaku ka pitikwa nando oshimaliwa shapewa omandiki moshitoplwa shishunwe ko kepangelo omolwa okwaaitula mo miilonga. 

Iipinge okwa popi ngaaka Etitatu sho kwali a ningi oshigongi naakuluntuwiliki yomahangano niikondo yopapangelo ya yooloka moshitopolwa nelalakano lyoku kumagindha nkene yena okulongitha oshimaliwa shoka oomilliona N$375 dha gandjwa okugwanitha po ooproyeka moshitopolwa, metengenokothaneko lyo2025/2026. 

‘‘Mboka itaaya ka gwanitha po iilonga yawo ye yi nuninwa otaya ka katukilwa onkatu, oshoka otaya ka ndopeka oshigwana. Omwa tulwa poonkatu dhiilonga mu longe ihe haku dhana nenge okwaayitula mo onkene tu longeni,’’ ta kumagidha ngaaka. 

Ta ti, oshimaliwa shoka sha pewa oshitopolwa shaShana ina hala nando shi shunwe ko omolwa inaashi longithwa, omanga oshitopolwa sha pumbwa ehumokomeho. 

Iipinge okwa ti, okwa ti okwa hala ashike okugandja olopota yiilonga yalongwa noshimaliwa ashihe, ihe ina hala okushunitha olopota yina oshimaliwa. 

‘‘Onda hala okushuna nokambamba kaakena nando epeni limwe omolwa oshimaliwa sha longa okuhumitha komeho oshitopolwa shika, onkene natu longeni twiitula mo,’’ ta kumagidha ngaaka. 

Ta gwedha po kutya oshigongi shoka ina shi ningilwa osima yo wala ihe osha ningilwa okutsa omukumo omandiki nkene gena okugwanitha po ayihe okuhumitha komeho oshitopolwa shaShana. 

Ngoloneya okwa ti , oshitopolwa shaShana oshina ashike elalakano lyoku hwepopaleka nokuhumitha komeho oshitopolwa. 

Esiku ndyoka Iipinge okwali a holola euvo nayi omolwa aakuluntuwiliki yomandiki ya hiywa ihe inaya holoka ayehe. 

‘‘Pamwe sho iinima itayi ende nawa moshitopolwa shaShana omolwa okwaagongala kiigongi ya simana ngaashi mbika. Ka shili mondjila, uuna itoovulu okuthika kala wa tuma ko omuntu ngoka teku kalelepo,’’ ta nyenyeta ngaaka. 

Ngoloneya okwa thindi omuthindo kutya omandiki agehe oga hiwa, ta ti oye a shayina oombapila dhoka. 

-vkaapanda@nepc.com.na