KASIKA – Kanako ya poto kwa Kasika mwa kweli ya Yowa ñohola, bayahi ba Kasika neba bilaela hala mubuso kupalelwa kulundulula muyaho wa kwa museto wa Kasika, one ukile waneulwa ki nyandi Gerhardus Visagie. Kanako ya kubona muyaho mi pula haikala kunela mubihi yoo, nakile abona mezi hane akena kuzwelela kwa situwa ni limota. Babeleki neba bonwi balika kuteya mahele mokupuya kono nekupala. Pula hainela hahulu neba hapelezwa kukwala ofesi.

Zeo kaufela sekaba matangu kasamulaho likwambuyu walikolo la mabasi, miseto, buiketo ni silelezo Albert Kawana nailo kwalula ma ofesi amanca kwa Kasika ni Impalila. Mwa manzwi ahae Kawana naize kukwalulwa kwa ma ofesi amanca kusupeza ciseho ya mubuso mwa kubabaza litaba za bupoti sina Kasika ni Impalila halifumaneha bukaufi ni linaha za Botswana, Zambia ni Zimbabwe.

Nabulezi hape kuli miyaho yeo ikona kuba ye minde kwa sicaba haiba inge ibabalelwa hande. “Kuyaha miyaho kinto yeñwi kono kuibabalela ki yeñwi. Kacwalo, babeleki kwa miseto nibao babafilwe musebezi wakubabalela miyaho ye ba bone kuli miyaho yatokomelwa. Ki miyaho yanaha Namibia, kacwalo, iswanela kuina nako yetelele kuli masika akwapili niona ato isebelisa,” nekubulezi Kawana.

Mubusisi wasikiliti sa Zambezi Lawrence Sampofu naize lineku kosifumaneha sikiliti sa Zambezi kubiza mubuso kubona kuli kutahiswa miyaho, kakuli kwa mukulela kaufela batu bakona kusila ni kukena mwa linaha zeli bukakufi ili Botswana, Zambia ni Angola. “Kacwalo, kutoma miseto ya kusilela mwa libaka mokusilela hahulu batu, kufukuza lipiho za kusila isi kamulao,” nekubulezi Sampofu.