OSHAKATI – Sho ethimbo lyomauliko giipindi monooli lyi li metifa, aaunganeki yomaudhano googonyo nayo otaya longitha ompito ndjoka okuhwahwameka nokuulika iitalenti yaadhaningonyo.
Mehuliloshiwike ndika, MTC Boxing Bonanza oya longekidha omaudhano goongonyo ngoka taga ka ningilwa komauliko giipindi kEkuku uusiku wOlyomakaya.Omuhwahwameki nomudheuli gomaudhano goongonyo Joseph Bernard okwa ti omaudhano ngoka oga nuninwa okulongekidha aadhaningonyo mboka taya ka kutha ombinga momaudhano goongonyo gopashitopolwa opo ya vule oku ka kutha ombinga komaudhano gopashigwana ngoka taga ka kala ko omvula ndjika.
“Omalongekidho otaga ende nawa sigo oompaka. Otwa hiya natango omahango gomaudhano goongonyo ga popyoka nawa monooli osho wo gamwe taga zi koWindhoek,” ta popi ngaaka.
Bernard okwa fatulula kutya oya longekidha okudhana omaudhano ngoka komauliko giipindi kEkuku oshoka ohaku kala aantu oyendji, opo omaudhano ngoka ga tseyike wo.
Omauliko giipindi gEkuku oga tameke okuza momasiku 25 Juni sigo olyotango lyaJuli nuumvo pehala lyowala kEkuku lwopooha dhondjila onene okuya kOkatana.
Shika otashi kala oshikando oshititatu omauliko giipindi gokomumvo kEkuku taga holoka. Omugandjigomauyelele mondoolopa yOshakati Katarina Kamari okwa ti omauliko giipindi ngoka kage li kohi yelelo lyondoolopa ihe oya gandja ashike ompito ndjoka kwaamboka taye ga longekidha.
“Ompito ndjoka ompito ombwaanawa kaanangeshefa okutaambathana omadhiladhilo ga yooloka nkene ye na okulonga noongeshefa dhawo, okweeta oshimaliwa mondoolopa osho wo okweeta omawunawa galwe popepi naakwashigwana uule womasiku ngoka,” ta popi ngaaka.
Ta gwedha po ta ti elalakano lyokweeta po omawuliko giipindi ga yooloka mondoolopa okuulika ehumokomeho lyondoolopa yawo, osho wo okugandja ompito kaanangeshefa aashona naanene okuulika iilandithomwa yawo.
-vkaapanda@nepc.com.na