Auleria Wakudumo
Ehangano loStanlib Namibia ola yandja ekwafo lokatemba kopashinanena komuhongwa e li mopre-primary kofikola hai ifanwa Atanasius Penda Private School mOgongo.
Fransina Mutilitha oku na eedula hamano nokwa dalwa noulema womaulu oo hau mu imbi okweenda kuye mwene ngaashi ounona vakwao.
Omunambelewa koshikondo shoimaliwa moStanlib Phillip Ashimbanga okwa holola kutya okatemba aka otaka kwafele Mutilitha oshoyo ovafilishisho vaye.
“Okatemba otaka ka kwafela yoo okaana opo ka twikile okuya kofikola pehena ounyengwi washa,” Ashimbanga ta ti.
Mutilitha ota yi mondodo yotete modula tai ya.
Ina yaMutilitha, Alma Iiyambo omukalimo womIipanda mOgongo okwa holola olupandu kehangano loStanlib eshi la uda onghuwo yaye.
Iiyambo okwa ti kutya osha kala shidjuu okututa Michael efiku keshe okuya kofikola.
Iiyambo okwa holola kutya okwa kala nokududa odula aishe ei, ta humbata omona oku mu twala kofikola.
“Ohandi humbata omumwange modikwa eekiliometa da konda po16 e uye kofikola kOmbafi Combined School. Molwaashi oshinano osha ka kala shile unene okuya keshe fiku, otwa ka lundulula ofikola,” Iiyambo ta ti.
Iiyambo okwa weda po kutya nonande a pandula kekwafo eli a mona, natango otashi pula a kale ta undula okatemba komona fiyo okofikola, okuya noku aluka.
“Ondina edilaadilo lokumu twala mofikola oyo yina omuhandjo opo shi kale shipu kuye,” Iiyambo ta holola.
Iiyambo okwa holola yoo kutya okuna edilaadilo loku konga oilonga opo a palule ovakwanedimo laye ashike ita dulu molwa ounghundi womona.