Auleria Wakudumo
Opolifi oya londwela ovadali novatekuli vounona opo va fiile ounona oshisho mefudo.
Omupopiliko wopolifi, Deputy Commissioner Kauna Shikwambi okwa holola kutya ounona otava i mefudo nena momafiku novadali ova pumbwa opo va kale ve litula mo metonatelo lounona.
“Eshi osha hala kutya omalinyengo ovakwashiwana moshilongo otaa hapupala eshi ounona vofikola ve li komaumbo. Onghene opolifi otai indile ovadali opo va kale ve li oupafi nokukotokela ounona pefimbo eli,” Shikwambi ta ti.
Opolifi oya kunghilila ovalongifi vopate opo va kale ve li oupafi ngeenge tava shingi ile tava tauluka opate.
“Ovadali otava indilwa va lungamene ounona unene meenhele odo di hadi ovanhu nokushiiva alushe apa pe na okaana koye. Longeni ounona va kale kokule novanhu vehe vashi, okutauluka opate nokukala peenhele odo veshi nodi shiivike,” ta ti ngaho.
Opolifi oya ti ovadali nava shiivifilwe ounona ngeenge tave va pitula ponhele yonhumba opo vaha ye novanhu vehe vashi oshoyo okukala veshi kutya otava dengele lye lye ngeenge veli moudjuu.
Opolifi otai indile yoo ovashingi voihauto opo va shinge nouhasha.
“Nava kale kokule nokulongifa eengodi ngeenge tava shingi, inava shingilila meendalaye nokushineya vehe wete ko komesho, oihauto nai kale monghalo yokopate,” Shikwambi ta ti.
Ovashingi otava indilwa vakale vena eengodi deeambulasa, dopolifi nadikwao da fimana pefimbo loshiponga.
Ovakwashiwana otava indile va kotokele ovakengeleli nookalyamupombo ovo hava kala va tana ovanhu unene mefudo.
Ovakwashiwana ova kunghililwa vaha yandje ouyelele washa mwa kwatelwa ouyelele wokombaanga ngeenge tava pulwa kovakengeleli.
“Kala alushe wuli oupafi nokulopota keshe okaima tofeekele, ino kala monhele uhe shiimo ile ukale novanhu uhe vashi,” Shikwambi ta ti.
Opolifi otai indile ovakwashiwana elongelo kumwe lovakwashiwana opo va dule okulopota oiningwanima oyo tai ningwa momidingonoko davo.
“Ohatu indile elongelo kumwe lovakwashiwana okukwashilipaleka eameno unene eameno lounona vetu opo va dule okukala tava danauka momidingonoko detu vehena oumbada,” Shikwambi ta ti.
-wakudumoauleria@gmail.com