ONGWEDIVAS – Danasîsenǂuira direkters, ministeris ǁgau!nâs dis, Sanet Steenkamps ge ge mî, N$18.3 biljuns hîa ge 2024/25ǁî kurib mariǂnûiǂuis !aroma nē ministerisa a ǂnûiǂuibahes nî īǁkhāsiba māsa, hāǀarora ǁgau!nâ-aon nî !gaehes diba ǂhâbasa !gôab ǁgau!nâ-aon nî hāse.
“Sida ge ge mîǁgui, î da ǀorodomma 200 ǁgau!nâ-aona !hūb a ǂhabase hoa ǀkharigu !nâ !gaoǁgui ǁgau!nâs !aroma !gae.
Sida ge ǀnî ǀkhai!nâ sîsensoadi hîa da nē kurib !nâ khoena nî !gaeǂgā!nâde ūhâ,” tis ge ge mî.
Steenkamps ge nēsa ǂoa ge wekheb Donertaxtsēs ais ge New Erab ǀkha ūhâ i dî!nâǁgamǁare-i !nâ ge mî, ǁîn ministeris ase nē mariǂnûiǂuis xa ra !gâiaǂgaosa, ǂan!gâ rase ǁnāpas ge 9%gu di ǀgapiǀgapisa a hâsa, ǂoa ge kurib dis ǀkha ǀgoweǀnōs ai. ǁKhāti i ge nē kurib di !Hoaǂkhaiba xu 5%gu di ǀgapiǀgapisa hoa ministeris sîsenaon !aroma ǁkhâkorobe !khō!oamaridi ai nî hâ. “Sida ge N$680 miljunsa ǁnā ǂnûikhâidi !aroma ge ǂnûiǂui,” tis ge gere mî. Ministeris ge 723 ǁgau!nâ-aona ge !gae hîa nē mariǂnûiǂuis !nâ a !khōǂgāsana.
“Nē ǁgau!nâ-aon ge ǀnai skolgu !nâ a !gaeǂgāsa tsî da ge skolga xu ǀgui !nuriga !âuhâ, mâtikō hāǀarora ǁgau!nâ-aon noxopa a ǂhâbasas diga,” tis ge gere ǀgongon!gao.”
ǁKhāti da ge omkhâisens !aroma 37%gu ǀgapiǀgapisa mariǂnûis !nâ ge hō.
ǂOa ge kurib !nâ da ge kurib ǁaegub ǁkhawa kō!gâs mariǂnûiǂuis dis !nâ N$706 miljunsa ge !khō!oa hâ i tsî da ge nēsi N$970 miljunsa go !khō!oa, ǁîsa xusN$100 miljunsa ǁgau!nâs konferensisa xu ge ǂoaxa aoǁguiga sîsenxa kais !aroma nî sîsenūhe tsî !gauga marisa hāǀaro ra ǁkhāǁkhā!nā-omdi tsî !gâi!gâi!nâs !aroma nî sîsenūhese.
Steenkamps ai!â gere mîsa !oas ge nē ǂnûiǂuisa N$18.3 biljunsa xu N$14 biljunsa sîsenaon di ǁkhâkorobe !khō!oamaridi !aroma nî hâ.
ǁÎs ge ai!â gere mîs ge, noxopan ge hāǀarora maris tsîna a ǂnûiǂuibahe hîa hoa 14 ǀkharigu ǁga nî sî!kharuhesa in ǁnāpa xu !oabade khoena ǀgūǀgūba. “Sida ge nēsi mâ ǂam skoli ǀgôa-i hoa-i !aroma N$300 (ǂguro ge N$200 ǀguisa i) tsî N$400 sekondere skolǀgôa-i !aroma (ǂguro ge N$300) nî mā.
Nēn hoan !aroma da ge sida a ǂkhî, nē !harib ais tsînas marisa mûmûsase a ǀarosa !khais !aroma,” tis ge ge ǀaro.