Kape nomundu ma sewa mo tjihua ma unda nokuhina oku purukutisiwa, Ocommunity Against Stock Theft Organisation, ousupi OCASO, tji mai hungama  kangamwa ngu norupa, mo ku tjiwa poo oku hatjiwa, mo mbyarero yomarunga wovinamuinyo mEpukiro na Eiseba. 

Katjisupi OCASO mai pitisa orapota otjimbandwangoma ndji mai haraka otupa pekepeke, kutja Oporise ya Namibia, nu tjinene otupa twayo twa Pukiro na Eiseba, ovanane vombazu na wina ovyombanguriro morupa rwavyo okuhonaparisa nokuvyarisa omarunga wovinamuinyo mokuhina okuyandja ohambwarakaṋa yao nandarire okaoko ooimba na mbena okuvatera OCASO okurwisa ourunga.  Nandarire mozongondjero zOCASO ozengi, ozo omungandjo tjinga otupa twarwe atu ha yeta ominda vyato. Tjimuna omayuva womasuviro nga zuko OCASO tji ya karere nozongondjero pekepeke zokukambura omarunga mOtjimati tja Pukiro posi ya korusenina ovahakerwa mba ave karira ovandu ovakutuke momeho woporise tjinga ave ha vaserwe nonyama. Nandarire kutja omahuno pu pa ṱirire ozongombe ya kamunikire. Posi ya mena roungundipare wotjiwaṋa otjini noporise ya Pukiro, omarunga nga aye ha yenene okutjaererwa po ngunda aye ha tupukisa onyama kOtjomuise.  Tji tjiri otjiṋa tji matji ihamisa OCASO tjinene nu tji iihamisa mokutja ongondjero yayo ndjari kokutja ovahakerwa mba tjayererwe pEharui i yoporise owo kanaa va vaserwe nouhatoi.  Omuṱuta nomuture wa Tjimati wa nongerwe netemba roharive ndo ndaari nyinganyinga motjirongo ouṱuku ne riteza.  Posi ya tji ma kapendura ovature ovakwao motjirongo nOCASO, tjandje omarunga maye tuurunga ovirongo ouṱuku okuyenda kOtjomuise.  “Otjiposa hi itjimwe movingi ovikasuka vyotjiwaṋa mbi ngundiparisiwa ongono yorupa orutwe momaunguriro woveta, motjiṋa hi ndjiri oporise mEpukiro,” Sandie Tjaronda ma tja. Na weza kokutja oongaro oviposa mu vi kayanda monyee mena romaunguriro omavi woporise nokuhina okwenatja kwayo. Na tjiva vovaporise okatama neyo nomarunga. 

Okuiisira kongaro ndji kara po, Tjaronda otje hi nomaundjiro kaparukaze motjiposa hi otjisenina tji. 

 Ovahakerwa mba maku zu ovatjiukwa tjinga ave noviposa ovingi pekepeke mEpukiro. Wina otjiwaṋa matji rakiziwa kutja ovanaumba nu nandarire umwe wawo wa zuvakere ama tja: "mbi mo paha, ami mba tjiti!"