Opolisi moshitopolwa shaShana oya manga aantu yeli 92 muule woomwedhi ashike mbali, sho ya adhika taya hingi ye li kohi yiikolitha.

Omukuluntu gwopolisi moshitopolwa shaShana Naftal Lungameni Sakaria okwa ti aahingi yiihauto ayehe mboka ye li 92 okwa li ya mangwa po okuza momasiku 1 Januali sigo omasiku 27 gaFebuluali nuumvo.

“Moshitopolwa shaShana aahingi yiihauto taya hingi ye li kohi yiikolitha, ihaya pewa egeelo lyopambapila ihe ohaya mangwa po opo ya ka holoke mompangu,’’ta ti ngaaka.

Ta ti, shoka oyeshi tokola onga omukalo gokushonopaleka iiningwanima yi li ngaaka.

Oyendji inaya kala ye na ko nasha oshoka nonando oya pewa egeelo, natango epuko ndyoka a ningile ohela, ote li endulula ashike nena.

“Otandi tsikile okukumagidha aalongithi yopate ya hulithe po okuhinga omanga ye li kohi yiikolitha oshoka osha nika oshiponga nohashi eta iiponga yombaadhilila,” ta kumagidha ngaaka.

Ta ti omumvo gwa yi pethimbo lyomatango omanene omwa lopotwa aantu ye li 64 ya mangwa omanga kwa li taya hingi ye li kohi yiikolitha.

Sakaria okwa ti oshitopolwa she otashi tsikile okutala moondjila aahingi mboka taya hingi iihauto ye li kohi yodhungo.

Okwa ti aapolisi otaya ka kwashilipaleka kutya omuhingi kehe ota hingi e li nawa ke na nande iikolitha sho taya kala ya tula po oomboloka dhi li pomahala ga yooloka moopate moshitopolwa ashihe.

Okwa hokolola kutya opolisi otayi longitha omukalo gwokufudhila mo ndele tashi ka kwashilipalekwa koshipangelo hoka omuntu ta ka kuthwa ombinzi ndjoka tayi konaakonwa kutya oyi na shili iikolitha nenge kayi na. “Ngele shoka sha kwa shilipalekwa nena opo nduno taya vulu okumangwa ya wape okupewa eegeelo lyokuya mokakuma,” ta ti ngaaka. Opolisi yaShana natango oya manga po omulumenu gomimvo 36 ngoka anuwa kwa li ta futu omupolisi N$1 000 opo a mangulule kuume ke gOmuangola okuza mondholongo.

Omulumentu ngoka anuwa okwa li a mangelwa pehala tali ithanwa Hotel Destiny mOngwediva.

vkaapanda@nepc.com.na