Festus Hamalwa
Okaana keedula 15 okwa dengwa shinyanyalifa kohonda ya ina Etitatu efimbo longula koGibeon moshitukulwa shaHardap.
Omupopiliko wopolifi moshitukukwa shaHardap inspector Linea Heita okwa hokolola ta ti okaana oka kala nokuningilwa omahepeko okudja omudo 2017 kohonda ya ina. Opolifi oya ti omufekelwa oha denge okaana te ka ningile omatilifo kutya ote ka dipaa, omanga efimbo limwe oha kala te ka ula omalaka mai.
Vati omufekelwa ina va hombola nande na ina yokaana ashike ohava di meumbo limwe aveshe. Heita okwa ti neudo momafiku atatu omwedi ou, natango okaana okwa li ka dengwa kohonda ya ina, omo kwa li kadinda omesho. Etitatu efimbo longula omufekelwa okwa denga okaana neengonyo, nokukalyataula shinyanyalifa komutwe.
Heita okwa popya ta ti okaana okadengwa unene shaashi okwa li taka kungu ohonde, koo vati okwa li ta kaxuxu omaxu atilyana shaashi oluta lako okwa li la ninga omangwili ohonde.
Vati okaana okwa li yoo vali ka dinda moshipala, nomesho a tilyana a ninga omangwili eshi ka dengwa shinyanyalifa.
Okaana vati oka lyatwa nokoilyo yako youkashike kookanhu.
Opolifi oya ti nakudala okaana okwa kala eshishi kutya okaana oha ningilwa omahepeko kohonda yaye ashike okwa kala a mwena shaashi vati okwa tila okukanifa ohonda yaye ngeenge okwa lopotele opolifi.
Heita okwa ti meumbo omo omuna ounona vavali inaa va dalwa komufekelwa, na vo hava kala tava ningilwa omahepeko kohonda ya ina. Pefimbo okaana ta ka dengwa ina ya ko okwa hangika eli meumbo, ashike kena eshi a ninga po vati ova kala ashike va tala okaana ta dengwa.
Ovashiinda ova lopotela opolifi konima eshi va u da okaana ta kakuu mokule ta kadengwa. Vati opolifi eshi ya fika oya hanga nale okaana keli mexungu lohonde ta kakungu. Okaana oka twala koshipangelo sha kula shaCentral moWindhoek opo ka mone epango lopaunamiti lomendelelo.
Opolifi oya ti eshi okaana ka fika koshipangelo oka fika ko keli monghalo idjuu it aka dulu nokufuda.
Eshi okaana ka fika moshipangelo oka twalwa konduda oku hakukala ovanhu tava kondjo nomwenyo koICU keli komipepo shaashi it aka dulu okufuda nawa. Opolifi eshi ya pula ina yokaana okwa popya oipupulu ta ti kutya okaana okawa konghambe, ta amena ohonda yaye ta ti kutya okaana ina kadengwa shili.
Omufekelwa okwa dja mo meumbo fiku olo a dengwa okaana, omo ta kuhololwa
kutya ina a lukila keumbo fiyo onena. Opolifi oyeli pyakidila nokukonga omufekelwa opo a kale a kwatwa po.
Opolifi oya pulula oshimbofa shomahepeko omaumbo oukashike kookanu, nomakonakono opolifi otaa twikile.