ONGWEDIVA - Omanga aanasikola ye li mokafudho koshiwike shimwe, yamwe otaya yambidhidha aakaluntu yawo nokugwanitha po oompumbwe oshowo iilonga yomomagumbo.
Saima Iikela naSilka Neshunga yomimvo 10 oshowo 15, oya li ya adhika komutoolinkundana nguka, ongula yOmandaaha mOngwediva taya tyaya iikuni.
Aanasikola mboka yaali oya ti oya piti ongula yoshikadhona, opo etango sho tali ka yeluka, oya tyaya iikuni iiyamba. Oya hokolola kutya, shoka otaye shi ningi nelalakano lyokuyambidhidha aakuluntu yawo, kaaya themenwenwe po kiilonga. Iikela okwa popi ta ti, okukala mefudho lyosikola itashi ti okukala wa lala, wa tala oTv, nenge okulesha omambo ashike, ihe okuyambidhildha wo mpoka tapu pumbwa omakwatho gawo. “Meme okwa penduka ongula a ka nyangadhale, onkene natse out na okupenduka tu ka tyaye iikuni yokuteleka,” ta popi ngaaka. Ta ti, oye na okuyambidhidha yina oshoka oyo taya nyangelwa opo ya vule okulya, yo ya mone oonkondo dhokulesha omambo gawp, ya pite oosikola, ya yambidhidhe wo aakuluntu yawo. Neshunga okwa ti okanona aluhe oke na okuyambidhidha omukuluntu gwako mpoka ta nyengwa. Ta ti, oya longwa kosikola kutya ngoka ta simaneke omukuluntu gwe, oye omunelago nota kala a landulwa kelago aluhe.
“Aakuluntu yetu oye tu hole, sho osho shoka haya penduka ongula taya ka nyangadhala, ya wape ye tu paluthe, onkene natse out na oku ya pa omukumo noku yambidhidha naashoka tatu vulu nasho,’’ ta ti ngaaka. Ta kumagidha aanona aakwawo ta ti naya simaneke aakuluntu yawo, naya kale taya gwanitha po ashihe taya lombwelwa kaakuluntu yawo, opo ashike taya kala ye na elago nombili yaaluhe.
Pethimbo ndyoka aanona mboka yaali kwa li taya tyaya iikuni, okwa li ye na ondumba yimwe ndjoka ya gongela, noya popi kutya otaya humbata iikuni mbyoka komutse sigo okegumbo.
= Yina yaanona mboka edhina lye lyishiwike koshifokundaneki shika, sho kwa li a kwatwathanwa naye pangodhi, okwa iyithana ongomunelago omolwomagano gaanona aavuliki a pewa.
“Osha pumba aanona ye thike mpoka taya tyaya iikuni mondoolopa, oshoka otaya kala ye na ohoni okumonika kuyakwawo, ihe shoka onde ya kumagidha kutya naya tseye e taya igilile oluhepo lwaandjawo,’’ ta popi ngaaka.
Ta ti, okwa longo aanona ye kutya naya gwanenwe kwaashoka ye na, yo inaya kala ye na omalilila gaashoka kaaye na.
Okwa kumagidha wo aakuluntu aakwawo ya tekule aanona nomikalo omiiwanawa, nuuna esiku limwe ya kana ko, aanona otaya vulu okwiisila oshimpwiyu yoyene.
vkaapanda@nepc.com.na