Babañwi bababeli neba tamilwe mwa Rundu Labune kutisa nombolo ya babakulubelwa kuba balishumi, mwabulyangelino bwa bolule bamasheleñi kwa mutayi wapanka ya Windoko kwa Opuwo Lasabata viki yefelile. Zeo litaha kasamulaho mapokola basweli kulondota yene ili mubeleki wa panka Nico Rebebe, yakulubelwa kuli muleli yomutuna, kutisa cwale hasika tamiwa kale. Hala balishumi, balobapeli bazwelela mwa Rundu mi bababeli bazwelela kwa Opuwo, ili bao kaufela banyaziwa mwa bulyangelino bwa masheleñi ane abulezwi sapili kimapokola kuli alikana bolule bamyanda yemibeli.

Kono yomuhulu wapanka ya Windoko, Baronice Hans naize masheleñi abato likana feela bolule bababeli. “Sinyehelo yeo haifiteleli bolule bababeli, katuso yababeleki ba panka ni kamaiso ya panka ya Windoko. Hakuna masheleñi abababuluka kwa panka ane auzwizwe,” Hans nabulezi kwamakalo aviki yefelile. Hana kupilwe kuli ataluse kuli kibukai luli yene tondahala, sibuabui wapanka Samuel Linyondi naize panka isiala fasitatimende sapili, mi hakuna zeka bulelwa kufitela lipatisiso lifela.

Zeo halili cwalo muzamaisi swalelele wasipokola mwasikiliti sa Kavango ya Upa Eino Nambaho nanyatezi kutamiwa kwa babañwi bababeli. “Bababeli bane basiezi mwa Rundu neba tamilwe. Kutoloka kuli kaufela babatamilwe seli balobapeli mwa Kavango ya Upa. Yomuñwi wakubona naswelwi hane alika kuzusa masheleñi kwa mutayi wa panka ya Windoko mwa Rundu, mi babañwi neba swelwi mwalikomponi zeshelashelana,” nekubulezi Nambahu. Bao kaufela neba bonahalile mwa khuta Labutanu mi taba yabona neshimbululezwi kwa Opuwo, teñi muzeko nokwaluzwi sapili.

Kakuya kapiho yamapokola, Rebebe, nakandekile nibabanyazwa kasepiso yakubakenya misebezi kwasimu yahae. Hala litaelo zene bana ni kueza neli kukwalula libulukelo za masheleñi kwa panya ya Windoko, teñi nebana nikuno amuhelela lituwelo zabona. Kuzwafo kukulubelwa kuli neba amuhezi masheleñi amwahala N$200 000 ni N$500 000. Zeo halili cwalo panka ya Windoko isepisize kulifa mutu yakakona kufa bupaki bobukatisa kutamiwa kwa Rebebe masheleñi alikana N$20 000.