Muzamaisi walikolo la tuto Sanet Steenkamp ubonisize sepo hala mayemo atuto mwana. Yene ili likwambuyu Katrina Hanse-Himarwa niyena nafitisize manzwi aswana. Nebafitisize manzwi ao mwalingambolo zeshelana ni New Era. Steenkamp naize sina likota halinga nako kubeya miselo, tuto ibile nipuluko yende mi miselo ikataha. “Ee, haluna kubona miselo onafa, kono litatululo zelelilwe libile teñi,” nabulezi.  Zeo litaha hala kupatalazwa kwalinepo za sitopa sa 11 (NSSC0) ni 12 (NSSCAS).

Linepo zene patalalizwe Labulalu lisupeza mbubo ka 3,8% hakubapanywa ni silimo sa 2022. Hala baituti ba 40 682 bane bañozi litatubo, ba 10 261 bakona kuya mwasitopa sa 12, mi ba 30 421 (75%) musipili wabona ufelela mwasitopa sa 11. Steenkamp naize kunyatisisa linepo za 2023 hakukoni kuezahala kusatalimiwi butata butuku bwa Covid-19 nebutisize hala tuto mwa 2022. “Linepo za 2022 neli ponahazo yaniti yaseo nesi tisizwe kibutuku bwa Covid-19. Kacwalo baituti neba kena kakucincana, kutoloka kuli nebasina nako yeñata yakuina mwamakilasi,” nabulezi.

Nafitisize sepo yahae mwatuto mi naize, “lwakona kuhula mwatuto nibelubeleka nibona.” Hala silimo sa 2023 naize kubile ni cinceho yende. Naize nebasika yaha feela miyaho, kono neba lekile lisebeliso za kuluta ni kuituta ili kubona kuli maticele bafumana lisebeliso sakata. Hanse Himarwa yena naize kusatokwiwa kueza zeñata kuli miselo yatuto ibonahale. “Kamaniti lusali kwahule kufumana tuto saka, lumwa nzila,” nabulezi. Kono nalumbile bazamaisi ni baituti kalinepo zende.

Sibuabui wakatengo ka Nanso Dorthea Nangolo naize linepo libonisa cinceho. Kono katengo kaitamile kuli kubelekiwe katata. “Kubao babakanga muhato otatama mwa tuto, muzwelepili kueza hande. Lusweli kusebeza katata kubona kuli babapalezwi kuzwelapili baeziwa cwañi,” nabulezi. Mubakweli wahae Luciano Kambala naize Nanso haisika nyatisisa kale linepo, kono baka eza mukopano. “Kasamulaho akuikopanya ni bayemeli balikiliti kaufela, luka kona kufa piho sakata,” nabulezi.

Caption: