OUTAPIS - Dana Inspekters, Christina Dunem DaFonsechs ge ge mî, 27 khoen ge ǂoa ge kurib !nbâ aitsama a !gamsensa, ǁnāpan ge !gaidīb ǀkha a ǂgā-amhes khao!gâ. DaFonsechs ge nēsa ǁnāpas ge ūhâ i ǀawa!namn di ǂnûs hîan ge !kharagagu !hao!nāsi ǂuruǂuru-aon, Pentecostal kerkhegu tsî !garo!ā danakhoen tsîna ǁkhau!nâsa is !nâ nēsa ge ǂanǂan. 

Nē ǂnûs ge ǂoa ge wekheb di Fraitaxs ai Outapis hîa Omusati ǀkharib !nâ ǂnôas tawa ge ūhe hâ i. ǁî ge !khâikhom tsî ge gere mîba ǁhao-aona, !Gaib tsî !gaidīb ǂHanumās 27, 1933ǁî kurib dis !nâs khoe-e !gaib ǀkha ǂgā-amsa koro kurigu di !khō-oms ǁkharab tsî maris tamas ka i o marisi ǁkharaba a ǁgui-aihe ǁkhāsa. “A da ū-oasen ama tama !gai-aose tamas ka i o profetse aimâisensa xu. 

Tita ge mî tama hâ, tā da !hao!nāsi ǂuruǂuru-aona sada !garo!ādi !nâ ūhâ ti ǁîn a sada !hao!nāsib di !â amaga, hoara ta ra !khâkhoms ge, i da tā khoena hā ǂgaeǂhapu,” tis ge ge mî.  ǀHûhâsigu !nâ ra sîsenma ǀawa!nam-i ge ge mî, ǀnî !hao!nāsi ǂuruǂuru-aon tsî Pentecostal kerkegu di ǁkhāǁkhā-aon ra ǁî-aitsama !khū!khūsens !aroma !gomsin !nâ hâ ǀhûhâsib ǁanina ǁî!nāpe ǂgāǁaresa, ǁnāpan !gaigub ǀkha ǁîna ra ǂgā-am amaga.  “Sida ge !aruǀî ǂgomǂgomsa !hao!nāsi !gai-aona ūhâ tama hâ. ǁAes ge ra ǂgaeǂhapuhe tsî ǀaokhoen tsî omaride ǀgorahe ama tama ǂgā-amdi ǀkha,” tis ge ge mî. ǀGonǀgon!gaos gere !khais ge, ǂgui khoen nētsē ǁîn ûiga ama tamase !gaib ǀkha ǂgā-amhe tsî ge ǂoa!nâsa. 

“Khoen ǀonde ama tama !gaib ǀkha ǂgaiǀonǀû hanats ga ǁawosa amaba ūhâ tama i o. A da ǀû ǁnâu!hoa tsî ǀū da a xūna ǀhae!hoa tamas ka i o ǂhanu tama ǂans ǀkha ǀhapio khoena !gaeǁaresa,” tis ge dana inspektersa gere ǀkhoma. 

Nēs xa ra !aromahesen ge ǁanǁare-aon, sîsenǁare-aon tsî ǀaokhoena ǀgui ǀae-i ai !aruǀî ǂnû tama hâ. !Aruǀîs ge DaFonsechsa ǀgaisa !khâikhomsa !hao!nāsi ǂuruǂuru-aon tsî ǁkhāǁkhā-aona !oa gere dī, in ū-oasen !gāǂgāsa soǀôan hîa khoen ûiga a ǁkhōǁkhōsabana māsa. 

ǁKhātis ge ǁkhāǁkhā-aoga gere !khâikhom, ǂkham ǀgôadi ǀkha sorosise ǁgoeǀhaos tamas ka i o nau aogu di taradi ǀkha ǁgoeǀhaos !oagu. 

ǀAms ais ge !hao!nāsi ǂgaeǂgui-aona gere ǂgan, in ǁawoǁawo ǁîn di !garo!ādi ai hâ !hao!nāsi ǂuruǂuru-aon ǂhanusise a xoamâisa tsî ǂan!gâsa !khais, mâtikō !gôab !nân hâs tsî mâ ǁōn !aroman hâ !khais tsîna.