Omata gotango gomvula ngoka ga loko kiitopolwa yokonooli oga eta omukumo maanafaalama yomapya oshowo yiimuna, mboka ya kala ya taalela ondjala oshowo enota lyiimuna.
Omvula oya loko nawa miitopolwa ngaashi Omusati Oshana, Ohangwena nOshikoto, shoka sha nyanyudha aanafaalama.
Kundana sho a yi moonkundathana naanafaalama yamwe, oyendji otaya ulike ye na omukumo omanga yamwe ya tegelela omvula yokomasiku gokomeho.
Iikogo oya ningi esiku tayi gandja omukumo, ihe okupendukila Etiyali omata okwidhengi idhenge pevi.
Nonando omvula kakwa li oyindji ngaashi aanafaalama ya li ya inekela, oya talameka omeya miishana yimwe.
Omukulupe Hendrina Heita e li momukunda Omusheshe moshitopolwa shaShana, ngoka a li a pululitha nokukuna epya lye, okwa ti ina hala okweetha ompito ndjika.
“Kandi shi shoka shi li komeho, onkene onda tokola okulonga ombinga yimwe, nongele inashi enda nawa, otatu ka longulula ishiwe,” ta popi ngaaka.
Verena Nakaleke okwa ti, oya tameke okulonga epya lyawo shoka okutameka kuyele oku vule iilonga yahugunina, onkene oya tokola okukuna mbala.
“Otwa ningi aanelago, iilwa mbyoka twa kunu oya lokwa nale, nani inatu hepeka iilya oshowo oshimaliwa nethimbo,” ta popi ngaaka.
Hilma Shikoyeni gomomukunda Uukwangula okwa ti omvula ndjoka ya loko oya eta omukumo maanafaalama yomomapya.
Ta ti oya tegelela ashike ku ze natango omata gamwe, opo ya longekidhe oombuto dhiilya yawo.
“Onda kundana okupitila mooradio kutya iitopolwa yimwe moshilongo oya mono omvula oyindji, ihe shoka natango otashi tu pe omukumo kutya natse otatu ka mona omuloka omwaanawa momasiku twa taalela,’ ta ti ngaaka.
Nangula Thomas gomOshakati okwa ti, oya uvu nawa komvula sho ya loko, nondoolopa nayo oya talalelwa nawa.
“Otatu pandula komuloka omwaanawa, nonando hago lela gwa pumbiwa kaanafaalama, omwaanawa nomondoolopa,” ta pandula.
Aanafalama yomomapya mboka inaaya tameka okulonga momapya gawo oya ti oya tegelela omuloka gwa landula ko opo ya pulule omapya gawo.
Taya ti, nonando ya mona omukumo, uumbanda inau hula po thiluthilu, ngele omvula inayi loka natango otaya hepitha iimaliwa yawo.
Ookansela ya yooloka okupitila mooradio, oya kala nokugandja olupandu omolwaShiyenga ngoka e ga dhenge pevi, oshiwike shika.
Ta ya ti, omadhiilaadhilo guumbanda okukanitha iimuna yawo omolwondjala otaga ende taga kana, omolwomuloka omwaanawa.
“Omata ngoka otaga ulike kutya otwa tegelela omvula oyindji. Omvula itayi vulu okuloka ashike lumwe ee tayi mwena. Ondi inekela kutya otatu ningi aanelago,” omunafaalama Joseph Endjala ta popi ngaaka.
Endjala ta ti, ngele omvula oya loko natango iikando iyali nenge itatu momasiku tage ya, omwiidhi nago otagu ka kala gwa tsapuka nawa, niimuna oto yi imonene kokule.
vkaapanda@nepc.com.na