ǀAeǁgams ǁanǂgāsabeb hîa N$74 000 surudeb ǀkha omsa ge ǀumib ge ǁîb di ǂganamsens hîab ǁnâu!gâ!khaib ǁga ge dīs, îs ǀAeǁgams !Ā!khōmaisa ǁgarihe tsî nē marisa xoaǁnâba bi tsî naun hîa surudegu !nâ hân tsîn hoana !khōǂgā hâses !nâ !gâi!gâ tama ge i. 

Elifas ǀKhoeseb ge ǀAeǁgams !Ā!khōmais !oagu marisi mādawa-amsa ge ǂgā, mîb gereses !ā!khōmais di mîǁguib ǁîn oms hîa ǀAeǁgams di Dolam ǁanǁguib !nâ mâs di ǁgam-e ǁaras mâǂoa hâ surudesa maris !aromasa ǂhanu tama ge hâ i amaga. 

ǀKhoeseb ge ra mî, N$74 000 mâǂoa hâ surudeb ǁîb di ǁūǂoa ge ǁgûs dib ge ai!â ge ǁnāpa mā-ams ose gere hâ khoen xa a !aromahesa. 

ǁÎb ra mîsa !oab ge ǁîba nē oms hana a ǁgûs di ǂhunuma !khaisa ge ǂan tama hâ i tsî nēs !aroma mûsī tama hâ mâtib ǁîba ǁîb mamas tamas ka i o ǁîb xa !aromahe tama hâ surudeba nî mātare !khaisa. 

ǁKhātib ǁîba ra mîs ge, ǀAeǁgams !Ā!khōmaisa nē ǁgam-e Covid-19 ǁōs ǁaeb !nâ ǀaris ǂhanu tama hâsa ǁîs Covids ǁgaragu ǁga !gûǁare tama amagsa.

 ǁGam-i ge 21 !Hoaǂkhaib 2021 dis ai ge ǁarahe. 

ǁÎb di ǂganamsens ǁnâu!gâ!khaib !oab ge xoas !nâb ge gere ǂgan îb nē surudeb tsî nau hâ ǁanǂgāsaben hîa 5 xu disi kurigu di surudegu ǀkha ǂnôan tsîna xoaǁnâbahe. 

Nausas, ge ǀGapi ǁNâu!gâ!khaib di ǀGora!gâ-aos, Claudia Claasensa nē ǂganamsensa ǂoa ge wekheb di FRaitaxs ai ǂhara tsî ge mî, !Ā!khōmais ǁnā ǀgaiba ūhâsa, mātaresa tama ǁgam-i sîsenūsa ǁaras diba Nēs ge ǀAeǁgams !Ā!khōmais di surudeba mûǂams tsî māǂoa hâ surudeba ǀhaoǀhaos di xoaǁguib !nâ !khōǂgāsa. Nēs, ǀkhas ge ǀAeǁgams !Ā!khōmaisa ǀgui ǀgau-I !nâs tsîna ǂhanuo!nâse sîsen tama hâ ǁnā oms di ǁgam-e ǁaras !nâ.