ǂNŪǂGOAES - ǂHanub ǂNûiǂgādi Pension ǂGaes (GIPF) ge ǂoa ge wekheb di Wunstaxtsēs ai ǂnûsa ǀkharisi berodi ǂgaegui-aon, ministeridi, ǂnûiǂgādi tsî sîsenaon ǀkha a dīxūxa mâisan (HR) ǀkha ǂNūǂgoaes !nâ ge ūhâ i.
Edwin Tjirambab, GIPFs di danab !âǀhuru-aon !âb dib ge ge mî, ǁîn di ǁgūbas nē saris dis, !âǀhuru-aon tsî pension maride xu ra ǀamma khoen ǀkha ǀhao tsî kaise ǂhâǂhâsa ǁhōn ǂnamipe ǁgamǁare tsî ǁkhāti mûǂams !harodi !nâ ra sîsen mâisan tsî HRs !ereamsa tanihân tsîna ǁāǁāsa in dîdi tsî ǂâiǂhansendi !oaba-aona xu ra hāna ǂhanu tsî ǂgaoǀkhāsa !harib ai !eream ǁkhā, sîsenaon nē dîdi ǀkha ǂnôan ra ǁkhâkorope nē ǂgaesa marisise ǀgaiǀgai amaga.
“Sida ge ǁkhāti ge mîǁgui, ǁî-aitsama mâbasen hâ ǂnûiǂgādi tsîna da nē ǂnûs ǁga nî ǁkhau !khaisa, ǂgaiǀons ai Namibia Revenue Agency (NamRA), Namfisas, First Capitals, Public Service Medical Aid Schemes (Psemas) tsî noxopa ǀnîn hîa !oa!ū pensionsa xu hâ !gâi!gâna mātares ǀkha !nonaǁî !oaba-mā-aose a dīxūxan tsîna,” tib ge Tjirambaba ge ǀaro. ǁKhoreǁhares gowaǀîsab gere mā soab aib ge ǁKharas ǀKharisi ǀAwemā!nans aiǂnû-aob, Joseph Isaacksa ge mî, GIPFs kurigu di !oede !gâi aiǁgause ǀhûhâsiba ǂnûiǂgās ase ība tsî !kharagagu projekdi !nâ !hūb a ǂhabase ra ǁguiri !khaisa.
“Hoa!nâ-aixases ge GIPFsa !gâi māde ǀhûhâsise tsî sâuǁkhāsib omkhâisens ǂnamipe ge dī tsî xawe marisa ra māǂui!â ǁawosa hōdawade ra kuru,” tib ge ge mî.
“ǁKharas ǀkharib tsîn ge GIPFsa xu ra ǂoaxa maris ǀkha ra dīhe ǁguiride xu ǁaraǂuisa tama hâ, ǁnāpas N$247 miljunsa sao ran !aroma ge ǁguihe hîa, ǁkhawa sîsenūhesa enerxib, ommās omkhâis tsî omdi ǂnamipe hâ ǀkhuwimaridi tsîna ǁnā ǀkharib ǁanǂgāben !aroma.
Nē maris ge ǁKharas khariba !hūb !nâb -îba koroǁî !khais ai ǁguiri!nâsa ǀkharigu !nâ mâse,” tib ge Isaacksa ge mî. New Erab ǀkhab ge dî!nâǁgamǁares !nâ hâ i soab aib ge Robert Skeyera (61 kurixa) ge mî, nē ǀhaos ge ǂûǂûxa tsî harase ǂansa !khōǂgā hâ isa.
“Pension !khō!oa-aoda ase da ge GIPFsa ra ǂgan, in kō!gâ tsî sida tsîna kurikobe ǀgui ǁkhâb di ǁkhāsiba !khōǂgā hâ ǁkhâkorobe maris di bonesa mā,” tib ge gere ǀkhomaǂgan.
GIPFs di ǁawosa xūn di ǁkhāsib ge N$151.8 biljuns ai mā, ǁnāpas ǁanina xu ra !khō!oahe marisa N$4.7 biljuns ai māse. ǁAupexas ge N$6.9 biljunsa ǁnā ǁanin (ǀgôan, aob tamas ka o taras tsî ǁgaumâi khoen) hîa !gâi!gâna ra !khō!oan ai ge mātareǂuihe.