One Economy ǂNûiǂgās ge ǂhôare-aona mādawa-amsa mâǂoa hâ sîsenni hîan ǂoa ge kurib !nâ surigu ai !gao!gaosa ǂkhawadīb !nae!khaidi ǀhûhâsigu !nâ gere īde, ǁîn ǂhôamāǂuidi !nâ-ū harase gere ǂanǂan !khais !aroma.
Dan-aon ge !kharaga ǂhôamāǂui!khaigu ǂgaiǀons ai, ǂhôaǂgares, ai-īsiǂhôaǂgares, dixitale tsî ǁgâisa ǂkhanin diga xu ge ǂgaehe. Choolwe Siachoonos (Unam ǂhôaǂgaresa xu) ge ǂguro !haros dansa ǂhôaǂgare !âb ǂhôana xu ge !khō!oa, Vitalio Angulab ge ǀgamǁî !khais dansa a !khō!oa hîa.
Ai-īsiǂhôaǂgares !âb !nâs ge Selma Ikelasa ǂguro dansa ge !khō!oa, ǁnāpan ge Katemba Tjipepas, Gordon Josephi tsî Maria- Kaluusha hâna ǁîs !naka hâ dande a hōse.
Selma Iyambos ge dixitale !âb di ǀgapi dansa ge !khō!oa, Tuyeimo Hangulab tsî Shellegyan Petersons hâra ge ǁgâisa ǂkhanimûse ǂhôan di dande a !khō!oase. Mādawa-ams maris ge N$10 000 ai ǂguro danao-e tsî naun !aroma N$5 000 mâ-i hoa-e gere !khō!oa.
New Erab ǀkhas ge ūhâ i dî!nâǁgamǁare-i !nâs ge Iyambosa ǁîs di podcast ǂhôan ge mâpa xu a !hui !khaisa gere ǀgoragu. “Tita ge nē ǂâiǀgauba sîsenūsa ta nî ǁawoǁawo !khaisa ge mîmâibasen, in tā Namibiaǁîna nî khaohâse i sorosiǂharugudi ǂnamipe ra hâ ǁhōn !nâ, nē !hoa!âs hoaǁae sida omdi !nâ !hoahe nî xūse ī tama xui-ao,” tis ge ge mî.
Angulab ge ǁîb ǀkhāb ai ǁgoaǂuidi hîab ǀnîkhami ī ǂhôana ǀhaoǀhao tsî ǀhûhâsigu ǀkha nî ǀgoraguse gere īna gere ǀgoragu, aiǁgause Human Pappillomavirus (HPV) di !khāǁkhaes hîas ministeris ǂurusib disa ge ūhâs khami, ǁnāpab sîsenǁareba hō tama is xa ǁnā ǂhôas ǀkha ai!gûsa ge ǀû khami.
!Gam ǂgaroba ǂhôares tsî ǂhôamāǂuis !nâ !gûhâ tsî ǁkhāti The Namibian ǂhôaǂkhanib di !huis xoa-aos, Gwen Listers ge ǁkhā ǁaxasib tawa gere mî, ǂhâǂhâsasib ǀhupuxabahe tama ǁguiǂgāsens dis ǂhôares !nâ !gâi!gâba sī!nâs !nâ buruxa !âsa ra ǀhurusa.”Hana da ǂhôares !norasasiba nî ūhâs karao, o tare-i !aroma da a ǂoaǂamsa ǁoa? Tita ge !nāsa ǁaeba nē dîs ǀkha ra hâ tsî ra ǂgom nēpa xu nî ǂoaxa !ereams oresa nî hā-ūsa.
Ti ǁkhoreb ge nē dîs ǂnamipe da ga ǁnâuǂharusa a ūhâsa.
Xawe, a da hoatsama dītsâ tsî ǁnān hîa ǂhôares tsî māǂuis !nâ ǂhanu tama hâna oresa hōba tsî ǂgaoǀkhāsa tsî ǂâuǀoa hâ !harib ai sîsenna dī,” tis ge ge mî.