OMITARA – Omupeviminista guuthikepamwe wuukashikekookantu, ekandulepo lyoluhepo nonkalonawa Bernadette Jagger, okwa li a indile opo ku longelwe kumwe noshigwana ashihe nelalalkano ku kwashilipalekwe kutya oshikwiila shepangelo otashi longithwa ngaashi sha nuninwa, ano okuyambulapo oohandimwe ye li moluhepo lwamatutu. 

Jagger, pethimbo a li ta patulula pambelewa oshikonga shelongitho nawa lyoshikwiila shepangelo kOmitara moshitopolwahogololo Omaheke, okwa li a pula aaleli yopamuthigululwakalo, oongeleka, elelo lyopashitopolwa, aanambelewa yomuuministeli osho wo opolisi yaNamibia yi tameke okukonakona nkene oshikwiila tashi longithwa.

“Osha simana okuuvika ko kutya omayakulo gegameno lyoshigwana uuthemba womuntu, onkene okukeelela elongitho lyoshimaliwa shoka otashi vulu ku tiwe elongithonayi lyoonkondo. 

Kape na oveta tayi wilike nkene iimaliwa mbyoka yin a okulongithwa,” Jagger ta ti ngaaka.

Omunashipundi gwelelo lyopashitoplwa shaMaheke Ignatius Kariseb ngoka a li a tameke oshikonga shika, okwa ti omanyenyeto ngaka unene oga zi moshigwana, kutya anuwa mboka haya kwata oshikwiila shepangelo ohaye shi longitha pambambo, unene taye shit ula momangandja.

“Onkalo moshigwana ombwiinayi kombinga yaamboka haya mono okashona okuza kepangelo, epangelo otali lu lya tula ombunda moshihwa okukwathela oshigwana shi yambuke po shi kale noonkalamwenyo ohwepo, onkene ongelelo lyopashitopolwa otwe ya po noshikonga shika okulonga aantu ya longithe nawa omakwatho ngaka,” Kariseb ta ti ngaaka.

Oshikonga shika sha tameka mOmaandaha otashi ka thika koombinga adhihe dhoshitopolwa shaMaheke.Otashi ka hula mOlyomakaya. 

-Nampa