Mubihi waMutende

Kwamafelo akweli ye kampani yebona zalifulai ya FlyWestair ikana ifufela kwa Rundu habeli, nihalalu kwa Katima Mulilo kuzwelela kwalibala la lifulai la Eros mwa Windoko. Lifulai zeya Rundu likakala la 24 Muyana, mi zeya Katima Mulilo likakala lizazi lelitatama. 

“Mabala alifulai ao kiabutokwa kwalinaha zefumaneha mutuloupa. FlyWestair ibata kuzwisezapata tuso yaluna yakunungahanya bayahi banaha Namibia. Katima Mulilo muleneñi wasikiliti sa Zambezi, kimunyako wamafitelo kuliba kwalinaha zeñwi zewela mwakatengo kaSADC, ili Zambia, Zimbabwe ni Botswana,” nekubaleha sitatimende kuzwelela kwakampani yalifulai yeluilwe kibakwamukunda.

Sitatimende nesibulela hape kuli kutahisa linzila zaRundu ni Katima kuka imulula mutiyo wababata kuliba likiliti zaKavango ni Zambezi, kono habana nako yakunga misipili yemitelele. 

“Tahiso yalibaka zepeli haina feela kuimulula mutiyo kubabapila teñi nikueza lipisinisi, kono kukatusa kalulo yaluna yabutokwa yabupoti ili yebonahala kutotobela kanako yacwale,” kampani yalifulai nebulezi. Maeto amwanaha akampani angelezi cwalo nikuliba libala la lifulai la Andimba Toivo Ya Toivo mwa Ondangwa, kuzwa kwalibala la Eros haketalizoho mwaviki. 

FlyWestair nekalile lisebelezo zateñi mwanaha Namibia mwakweli ya Yenda 2020, likweli zesikai pili kutokwahala kwakampani yalifulai yene luilwe kimubuso ya Air Namibia, yene kwalile kabuyona mwakweli ya Yowa 2021. 

Haibeleka mwanako yabutuku bwaCovid-19, FlyWestair itatuba kakokwani kaCovid-19, kwaliofesi zayona kwalibala la Eros, mi bazamai kaufela bakupiwa kulatelela milao yakuisileleza kwabutuku bwaCovid-19, kungelela cwalo nikutina mamasiki kaswanelo musipili kaufela wamwambyumbyulu.

 “Luekelize hape nikolo yakuli muzamai ukona kusutisa nako yakufufa hañwi kamahala,” nekubulezi kampani yalifulai.