Lahja Nashuuta
Mukunda horowero gwaKhomas ntani nogu gwaJiangsu momandaha ganapuko kavanyaterere malizuvho omu navaruganena kumwe mokutwara ekuliko komeho momalizuvho gawo yimo ngoso yina kara melizuvho. Epenuno eli lyepe, vanakunyatera kwatunda melizuvho lyomwaPembagona 2015, nalimwe hena pokatji kaKhomas naJiangsu vakansela novantu vamo mo 20 Sikukutu 2023.
Ogu kakere nye tapitisire elikwamo eli nguuru gomukunda Laura Mcleod-Katjirua katente asi epongo eli talidemenene poyininke ntazimwe monomvhura odo ntano dinakara komeho. Kuna kara nye masayino aga gavali ganatupe nye nonkondo mokunyatera hena sikando sauvali omu tuna kuza simpe tukaruganene kumwe makutara maudigu getu paekuliko. Yimwe eyi tuna klumona asi tatukaruganena kumwe kuna kara pamukaro goyirugana , kugava mbatero kovanasure, ntani kukara nye nelikwamo lyovadinkantu omu navalidingura, marandesero nepunguro ntani kukulika nomuhoko detu. Age simpe kahundilire unene, ukanguki, erongo, maudano ntani kukulika nye yimeno yawo omu tuna kugazara nye kuruganena kumwe. ‘’ Ame kuna hara kumona ntani kuzuvha rusumo vana kudimba nonomurungu vanapolitika morwa ose tuna rugana ko yetu nawa nawa moomu yawapera.
Ngesi nayinye kuna kara nye momawoko geni one vanamberewa vetu, muna kara asi nyone wokutura mosirugana koyo tuna tokora yipo tuze komeho,’’ yimo ana kutanta munapolitika.
Ndango zokansela zaKhomas ezi kakarerepo munamberewa kurona Clement Mafwila, ano Ma Xin age kakarerepo Jiangsu. Awo nye ava vavali hawe navaruganena kumwe vatare asi matokoro gangesi ngapi naga za mosirugana, awo hena vadimburure asi yinke yina kara yokuhova.
Apa nye kahuyungire kupitira momutoroki, nguuru gwaJiangsu, Xin, katente asi vahepa kuturapo elikwamo lyoyirugana omu navadiva asi uholi wawo kuna kuza komeho, ponomukunda edi mbali. Nguuru, simpe katente asi ukwawo pokatji kawo, kuna kukura nawa monomvhura edi mbali dakapita.
Xin katente asi elikwamo patjangwa lina kutanta asi ngapi navarugana nalivatera omu navatura nayinye mosirugana, eruganeno kumwe, ngwendi merongo, madeuro, uhaku, mpo, maudano ntani unkurungu. Jiangsu kwadivikwa asi evango lyewa lina kukura nawa paekonomi, kuna kara ngesi pwauvali mokugavako ekuliko kosirongo saChina paekonomi, omu avagwana yimaliwa yokusika ko 12trillion yuan (US$1.71 trillion) momvhura 2023. –lnashuuta@gmail.com