RUNDU – Sibuabui walikolo la silalanda Romeo Muyunda uelelize sicaba sesipila kwamukulela wanuka sesi itinga falimbule kuzwelela mwanuka ya Kavango kutokomela hahulu. Kitaba yezibahala kuli mutu hakoni kubulelela sicaba seo kuli ba ambuke kuya kwanuka kakuli kona fobapilela, babañwi basila nuka kuyo potela bahabo kwalineku leliñwi; babañwi baya kwakuka mezi akusebelisa mwandu; mi buñata batapa nikutapisa kwamukulela wanuka.

Nihakulicwalo, likolo libulela kuli nihabana nikusebelisa nuka cwalo balemuhe kuli kuna nikozi yebandamezi. Banana nibona basike balumelelwa kubeya bupilo bwabona mwakozi kakuya banosi. “Likolo lieleza limembala zasicaba babapila mwalibaka mokutumile likomano ni lifolofolo kutona, ni kutokomela kutasezwa kilifolofolo zanaheñi. Lulemuhile lipiho zebilaeza mwasikiliti sa Kavango ya Upa, teñi batu bababalwa neba swelwi kilikwena mwa Sope,” nahatelezi.

Mamela ya Muyunda itaha kasamulaho alipiho zakuswaliwa kikwena mwanuka ya Kavango. La 1 Sope, kwena nesweli nikubulaya musali walilimo zemashumi amalalu kazepeli ili muyahi wamunzi wa Shikoro, yana zibahalizwe kuba Mudi Muhembo. Naswelwi hane ayoka mezi kwanuka, mi situpu sahae nesi fumanwi lizazi leli swana. Piho yabubeli ne ezahezi la 4 Sope kwamunzi wa Mutjiku. Teñi mushimani walilimo zelishumi kazesupile yana zibahalizwe kuba Peter Bunewero Kuwananayo nataselizwe nikubulawa hane ayoka mezi.

“Muitjiku kiomuñwi waminzi yene ifumani liliba zende, zene sulezwi masheleñi abulukezwi litaba zalipiho zalikomano mwahala lifolofolo ni batu, sihulu likwena,” neku ekelize Muyunda. “Muuna walilimo zemashumi aketalizoho naholofalizwe hahulu kikubu kwamunzi wa Marema mwasikiliti sa Kavango ya Wiko ñohola la 13 Ñulule. Anze afumana likalafo mwasipatela. Likolo lifitisa maswabi alona hala lipiho zeo kaufela. 

Luzwelapili kuikambota ni sicaba sesi pila mwalibaka mokutumile lipiho zalikomano ni lifolofolo hala mihato ya silelezo, hamoho cwalo nikuyepela sicaba seo liliba. Halutabeli kulatehelwa kibupilo bakeñisa lifolofolo. Kamukwa ocwalo lubata kufitisa manzwi aluna amatomolapilu kwamabasi,” nabulezi. Isali mwaviki yapili ya Sope, mwanana wamushimani walilimo zelobañwi yanali mwa Angola kwapumulo naswelwi nikubulaiwa kikwena kwa Kafuro, kwamukululela wanuka ya Kavango mabapa ni munzi wa Mazana, upa wa Rundu. “Kukulubelwa kuli banana babane, hamoho cwalo ni nyandi, nebaile kwakuka mezi kwanuka kwalineku la Angola kakusasa la 5 Sope kwena haiyo swala alimuñwi,” nekubulezi muzamaisi wasipokola mwasikiliti sa Kavango ya Upa swalelele Eino Nambahu.

“Nyandi kimuyahai wanaha Namibia mi nazibahalizwe kuba Kambinda Mateus Kambinda, yane ali mwanaha Angola kwapumulo. Hakuna lipatisiso zene ezizwe kakuli kezo ne ilo ezahalela mwanaha Angola,” nabulezi. Kasamulaho akezo yeo, museco nobile teñi lizazi leli tatami mi lilama zeñwi neli ilo fumanwa fasioli nyana fahali yanuka. Lasunda, sikwata sabalondoti mone kuna ni babeleki balikolo la silalanda ni mapokola neba ilo fumana kwena yekulubelwa mabapa ni sioli kezo ne ezahalezi. Seba ikunupa onafo mi bafumana liemba zeñwi mwamamba.

Caption: Bulailwe… Sikwata sabalondoti ili babeleki balikolo la silalanda ni mapokola neba ilo fumana kwena yekulubelwa mabapa ni sioli kezo ne ezahalezi mi seba ikunupa nikufumana lilama mwamba. Siswaniso