ǂUrusib ministeri, Dr Kalumbi Shangulab ge ge mî, sada !hūb ǀgaisa ǁgoaǂuide ūhâsa, ǂhanusise mā-amsa tama soǀôan tsî ǀhubuǀhubusenxūn tsî nauhân supuse ra hōsen amaga. Nē mâsib ge !gâi tama sîsenǂuiba ǁnā khoen hîa nē ǀhubuǀhubusenxūna ra sîsenūn di sorosi tsî danasi ǂurusib ai ūhâ. Shangulab ge ge mî, nē ǀhubuǀhubusenxn tsî noxopa nî hâ !kharaga!nâgu xūna sîsenūs, sîsenū-aona sao ra ǁōn, ǂgaiǀons ai HIV/AIDS, Hepatites tsî !naidi ǁōna a !aroma ǁkhāsa.
Namibiab ǀawa!namn ge ǀgūǁae ge ǂanǂan hâ i, Gamaǀaeb nē kurib dib !nâ ǀguin ge 153 khoena !hūb a ǂhabase !khōsis !nâ a ūsa sao ran ǀkha !gaeǁaresa ūhâse, xana-i, mandrax-i tsî tsautsausa kokain-i tsîn ǀkha. Nē ǀhubuǀhubusenxūn di ǁkhāsib ge ǀhaehe rasa !oa N$617 475 marisa !khōǂgā hâ.
“ǀAwa!namn ūhâ ǂans tsî xoamâisa !gôaga !oab ge Namibiaba !aruǀî ǀhubuǀhubusenxūn ra ǂgâxa-ū!nâ tsî !kharu-ūhe !hūb ase ǀgui ī tama hâ. xawe nēsi mā-amsa tama ǀhubuǀhubusenxūna ra sîsenū!nâhese go ǂoaxa.
ǂKham ǀgôan ge !nāsase nē sîsenū-aon !nâ ra ǁnā tsî !kharaga ǁgai ǁnaetigu hîa !gâi tama dīǀgauga ra !aromagu ǁga ǁîna garu-ū,” tib ge ministera ǂhanusi ǀnauǂgās !Hū!nāsi ǀHubuǀhubusenxūn Kōǂams Ôa!nâ!nans di ǁaxasib ǀAeǁgams !nâ ge hâ ib tawa ge mî.
Namibiab ge sao ra !auga!hūsi tsî ǀkharisi ǂhanugu tsî ǁgaragu !naka māsen hâ, ǂgaiǀons ai, UN ǀHûs mâ!oas Mā-amsa tama ǂHarugub ǀHubuǀhubusenxūn tsî Dana Mâsiga a ǂkhôadī ǁkhā ǀHubuǀhubusenxūna sîsenūs 1988ǁî kurib dis, UN ǀHûs mâ!oas !Hū!nāsise a ǀaweǁguisa ǂKhawadīb xa ra !gûs 2003ǁî kurib dis, UN ǀHûs mâ!oas Marisi ǁAma!khunigus ǀkha hâ ǀHôakao!narib 2004ǁî kurib dis tsî Afrikab !Khawagas Omkhâisens ǀHûhâsib (SADC) mâ!oasMā-amsa tama ǀHubuǀhubusenxūn ǀkha ǂHarugus 1996ǁî kurib di hâna.
“Mûmûsase gu ge ǀhubuǀhubusenxūn hîa sîsenūsa a !khâisana ra sîsenū khoen di !gôaga ra ǂharo !kharagagu kurina !khōǂgā hâse.
!Hau!hausasen ge nēpa kaise a ǂkham kurina ūhâ ǀgôan tsîna ǁîna ra sîsenū tsî nē ǀhubuǀhubusenxōna sîsenū tamase a hâ ǁoa tsî nau hâ ǂkhawadīb ǁaxasin !nâ ra !â,” tib ge Shangulaba ǁhao-aona gere mîba.
Kabinets ge 1999ǁî kurib !nâ mîǁguiba ū tsî !Hū!nāsi ǀHubuǀhubusenxūn Kōǂams Ôa!nâ!nansa ge ǂnuwi hîa ǂurusib ministeris xa nî mûǂamhese ise.