ǀNaib ge ǂoa ge kurib di ǁaegub !âb marikurib dib !nâ N$250 miljunsa, !gomma ra tsâ Meatcosa mâ hâ is khao!gâb ge mariǁhōn ministeri, Iipumbu Shiimiba ǁkhawa ǂoa ge wekheb !nâ nē ǂnûigāsa N$212 miljunsa ge ǂnûiǂuiba. 

ǁÎs hoan xa a ǀgapi !hū!nāsi mariǂnûiǂuis N$100 biljuns disab ge 2024/25ǁî marikurib !aroma gere mâi-ai!â soab aib ge Shiimiba ge mî “ǀHaob ais ge N$212 miljunsa- Meatcos !aroma a ǂnûiǂuihesa hîa ǁîn di mâǂoahâ marisi aib ai ǂoa!nâdi tsîna nî mātare ǁkhāse.  ǂOa ge kurib !nâb ge Shiimiba, nausab ge ǂnûiǂgādi ǁîn ǂhanub ai ǀgui marisihuiba !âuǂnûs ose aitsama mâbasensa gere ǂgaoǂgao!nâ, xaweb ge hāǀaro rase N$250 miljunsa ge mā. Meatcos Dana Sîsenǂuira Mâisab, Mwilima Mushokabanjib ge nausa ǂoa ge wekheb aib ge sîbahe hâ i dîdi ai !eream tama ge i. Dîdi hîab ge sîbahedi ge, mâtis Meatcosa ǀaweǁgui hâs, ǂnûiǂuibahes ge maris ǀkhas ǁîs di marisi !gomsiba xu a ǂoa ǁkhās ǂnamipe ge hâ i tsî sao rases Meatcosa noxopa ǂhanub xa marisi !gomsiba xu huiǂuihe hâse ǀgui nî hâǀgaras tamas ka i os ǁnāsa ǂgao tamas, ǁîs ǀnaisa aitsama ge mâbasen hâ i amaga. 

Nausas Meatcosa ǁîs !gâise marisa ra hōǂgā tsî marisi ǁgâiba xu ǂoahâ ti gere mî, xawen ge ǁamaxū-aon tsî !âǀhuru-aona gere mî, nē ǂnûiǂgās ǀgaisa marisi !gomsib !nâ hâ tsî ǂoa!nâs ai !nāsase hâsa. 

ǂOa ge kurib di Aoǁkhumuǁkhâb !nâ ge !nurihe hâ is ge, Meatcos ge ǂoa ge kurib di !Khaitsâb tsî Gamaǀaeb hâkha ǁaegu N$297 miljunsa kuru hâ isa. !Khaitsâb !nân ge 7 681 ûitsamaxūna Meatcos ǁganǂā!khaigu tawa !hūb a ǂhabase ge ǂāhe hâ i, ǁnāpab ge ûitsamaxūn !gôaba 11 379 ai Gamaǀaeb ai ǂāhese. 

!Khanǀgôab tsî Gamaǀaeb hâkha ǁaegun ge 38 000 xa a !nāsa ûitsamaxūna Meatcos tawa ge ǂāhe. ǀHaob ais ge N$444 miljunsa !hū!nāsise, ǀkharisise tsî !auga!hūsi ǂharuguga xu ge hōǂgāhe.