Omukainhu weedula 34 oo a lakifa ounona keembwa daye shaashi vati have di weelele, okwa pewa omhito yokulifutilamo modolongo.
Stephani Nadine van Vuure okwa holoka momhangu yaPuwo oshivike sha djako nokwa pewa elifutilomo loshimaliwa sheeN$2000. Okwa kwatelwe po shaashi vati a shiikila ounona eembwa daye noku va monifa oiponga.
Oshibofa shaye osha undulilwa komafiku 3 Juni 2024 opo ku yandjwe omhito yomakonakono.
Oshiningwanima eshi osha ningwa omwedi wa djako modoolopa yaPuwo.
Omukulunhu wopolifi koshikondo shokukonakona oimbuluma moshitukulwa shaKunene, omupedu Commissioner Paavo Iiyambo okwa koleka ta ti omukainhu ou vati okwa patulula omuvelo ndele ta shiikile eembwa daye ounona va hangika tava ende peumbo laye tava di kofikola.
Omukainhu vati ota ti okwa patulula mo eembwa daye shaashi ounona vofikola ohava welele eembwa daye ngeenge tava ende ponghulo yeumbo laye.
Oonakuninga oihakanwa ounona voukadona vavali, kamwe okee na eedula hetatu omanga kakwao oke na eedula 15.
Opolifi oya ti okaana kamwe okwa li ka tambulilwa moshipangelo shaPuwo ta ka mono epango omanga kakwao okapangwa efiku olo noku ya keumbo. Lwopokati opo, hamushanga wevava lovanyasha loSwapo moshitukulwa shaKunene, Kenaumue Tuaekoveni Moks okwa pitifa omukanda nyenyeto kombinga yomukainhu ou a vati a shiikila ounona eembwa daye.
Okwa ti ombelewa yoSwapo moshitukulwa shavo ita i popile onghalo yokatongo noukwamuhoko wa longifwa komukainhu ou shaashi osho otashi ulike kutya okwa dina ovalaule.
“Otwa hala omhangu i pangula oshibofa eshi pauyuuki pehe na oulingilingi. Oufemba wounoua ava owa pumbwa okufimanekwa ngaashi naana ovanhu aveshe,” ta ti.