Oshipupudilo shoNAMCOL osha patulula endiki lokuyandja eetundi dokompiuta kovakwashiwana ve na ohokwe yokulihonga okompiuta Etitano modoolopa yaMuthiya moshitukulwa shaShikoto.
Elalakano lendiki eli okukandula po omukundu wovanhu opo vaha kale vali tava ende eendjiladiledile vau ka komandiki ookule ngaashi kendiki laNgwediva.
Onghee paife omunhu keshe ou e na ehalo lokuliongela eifano lokompiuta oule wodula imwe okwa manguluka opo a kale elishangifa okukala ta longwa pendiki eli lipe.
Moshipopiwa shaye pefimbo ta patulula endiki loNAMCOL pambelewa, nongoloneya woshitukulwa shaShikoto Penda Ya Ndakolo okwa ti okwa pandula omukulunhuwiliki woNAMCOL eshi a pitika opo va kale va eta po endiki eli mOmuthiya.
Ya Ndakolo okwa ti endiki eli ota li lundulula eenghalamwenyo dovanhu eshi ovanhu vahapu tava ka mona ouwa mokupitila meetundi ta di ka yandjwa unene tuu ava ve shi okompiuta.
“Otwa didilika ovanyasha vamwe vehe na eshivo lokulongifa okompiuta onghee eshi omhito iwa opo ovanyasha ve uye momwaalu muhapu ve li shangife okukala tava deulwa kombinga yokompiuta shaashi okompiut oya fimana paife kovanyasha,” Ya Ndakolo ta ti.
Ngoloneya okwa kunghilila ovafikola tava kala tava longwa pendiki eli opo va kale tave litula mo moinyangadalwa yavo opo va dule okukala va mana eifano lavo.
Moshipopiwa shaye omukulunhuwiliki woNAMCOL Dr Heroldt Murangi okwa ti NAMCOL ota lalakanene okuyandja ehongo longushu moshiwana moitukulwa aishe opo oshiwana shi kale sha deulwa nokumona ounongo momaifano a yooloka.
Okwa ti ombelewa yaye okwa li ya lopotelwa kombinga yomukundu wovanafikola hava i keetundi doNAMCOL kOngwediva eshi shili eshongo la kula kovanafikola eshi hava kala tava ende eendjiladiledile.
“Endiki eli otali kala yoo vali tali yandje omayakulo kovanafikola tava endulula oilongwa yavo yondodo 12 eshi paife tava ka kala tave uya okulongifa eekompiuta ngeenge va hala okuninga omapekepeko kombinga yoilongwa yavo,” Murangi ta ti.
Murangi okwa kunghilila ovanafikola tava endulula oilongwa yavo opo va kale tava longifa endiki eli shaashi keshe mokompiuta ota mu kala mu na oishangomwa ya yooloka yoilongwa yavo opo va kale tave li hongo okupitila kompiuta.
Ester Namupala oye umwe womovanafikola ve li shangifa tete eifano lokompiuta pendiki eli, nokwaholola ta ti okwa pandula unene eshi paife va pewa endiki lili popepi shaashi itava ka ende vali oshinano shile okuya kOngwediva.