Kamaiso ya ofesi yebona zakuhasanya mulilo wamagesi mwanaha Namibia (NamPower), neiketezi kuzwelapili kukwala mulilo wamagesi kone kukalile Lamubulo kwalitolopo zena ni likoloti. 

Zeo liezahala nihaike katengo kamakwambuyu nekafile taelo yakuli keto yeo ibeelwe kwatuko, kufitela kuba ni lingambolo mwahala likolo la masheleñi, likolo la zwelopili yalibaka zalitolopo ni matakanyani, hamoho cwalo ni tutengo twalitolopo.

Mwasitatimende sene sifilwe viki yefelile Labulalu, katengo ka NamPower neka nyatezi kuli neka fumani taelo kuzwelela kwakatengo kamakwambuyu, kono kasamulaho akutalima taba yeo handende katengo ka NamPower, nekaboni kuli silelezo ya kampani kiya butokwa kacwalo kuzwelapili nikukwala mulilo wamagesi kona feela tatululo. 

“Kampani neketile kuzwelapili kukwala mulilo wamagesi, kakuli kona tokwahalo mwakubukeleza kampani nikuzwelapili kuhasanya mulilo wamagesi mwanaha. Kukwala mulilo wamagesi neli keto yamafelelezo kasamulaho akulika linzila kaufela, kakuli likoloti halisa lifiwi haluna kukwanisa kuhasanya mulilo wamagesi mwanaha kaufela,” kubaleha sitatimende.

Hana bulela ni babihi bamakande kweli yefelile, muzamaisi yomuhulu wakampani ya NamPower Kahenge Haulofi naize kampani nekolotiwa lulelule ni licika (N$1.5 billion), mi masheleñi alikana bolule ba N$842, nasafitelezi nako yetelele. Kacwalo kikwabutokwa kuli masheleñi awo alifiwa. Likwambuyu wamasheleñi Iipumbu Shiimi nabulezi mwandu yamilao Labubeli kuli tutengo twa litolopo totuna ni likoloti zetuna tuikopanye ni kampani ya NamPower nikubona kuli likoloti lilifiwa cwañi.

Mwamulelo wakukoleka likoloto, kampani ya NamPower isusueza baleki kulifa likoloti, mane nebulezi hape kuli ikona kuliuluwa kakutakula kekezo fa likoloti zefumanwi mwalikweli zelishumi kazepeli zefelile. Yeo neli kalulo yene mata kutaha la 31 Kandao 2023 baleki hane bakalifa likoloti kaufela. Ne ama feela likoloti zene fumanwi mwalikweli zelishumi kazepeli zefelile.