Festus Hamalwa
Omupedu primaminista Netumbo Nandi-Ndaitwah okwa ti omalelo opamufyuululwakalo naa yandje edu kofikola yoSt. Mary pOdibo opo ovanafikola va kale tava ningi oikunino yavo.
Okwa ti osha fimana ngeenge ovanafikola otava kala tava longo oikulya yavo vene tashi pitile mokulonga moukunino vavo yofikola.
Ndaitwah edi okwedi popya Etitano pefimbo kwa li ta patulula odalate yoluumbo netungo lewalanda lomeme veli humbata kOdibo. Okwati ounamapya owa fimana shaashi ohau dulu okukondjifa ondjala noluhepo moshilongo.
Okwa kunghilila omalelo ayeshe opamufyuululwakalo opo a kale ta yandje omadu keefikola opo ovanafikola va kale tava ningi oikunino yavo ihapu, ina oikunomwa ya yooloka.
“Ngeenge ofikola St. Mary oya kala ina ovanafikola tava longo moikunino younamapya eshi otashi eta opo ofikola i kale tai longo oikulya yayo vene ngaashi oyiimati,” Nandi - Ndaitwah ta ti.
Ndaitwah ou eli yoo onga omupedu presidende wongudu yoSwapo okwa ti oshiwana na shi kale shina eudeko la wana kombinga younamapya opo shi kale shina ohokwe yokukufa ombinga mounamapya.
“Ounamapya owa fimana moshilongo shaashi ohau dulu okuhambula po eliko loshilongo tashi etwa ngeenge ovanhu tava landifa oikunomwa yavo komandiki omangeshefelo,” Nandi-Ndaitwah ta ti.
Okwa popya ta ti ngeenge ovanafikola ovena edu lakula lokuninga omaludi oikunino nena eshi otashi eta opo ofikola i kale tai longo omaludi oiiyamati ahapu, omo ovanafikola tava kala tava landifa oikunomwa imwepo opo ofikola i kale tai mono oshimaliwa.
Ndaitwah okwa lombwela ovahongifikola ta ti na va kale tava longo ovanafikola kombinga yefimano lounamapya shaashi eshi otashi yandje eudeko la wana kovanafikola kombinga younamapya.
“Omadu na kale ta yandjwa okulongifa oinyangadalwa ya fimana ngaashi okutunga eefikola, omandiki ouhaku ile epolongalama dovanyasha momikunda nosho tuu oinyangadalwa ikwao tai dulu okuhambula po oshiwana,” Ndaitwa ta ti.
Okwa weda po ta ti ofikola St,Mary nai kale tai longo ounona vofikola oukriste ngaashi naanaa sha kala shito hashi ningwa pofikola oSt.Mary.