Festus Hamalwa
Oipangelo moshilongo oya talela eshongo lohonde ina i wanena ovanhu veli momhumbwe shaashi ovanhu otava ende nakashona okuyandya ohonde. Edi oda popiwa mokukanda pitifi wa dja mombelewa yomupopiliko wehangano lokuyandjaloNamibia Transfusions Service of Namibia (NamBTS) Titus Shivute mEtine. Shivute okwa ti ehangano lavo ka li na vali ohonde yawana okuyandja kovanhu vahapu.
Shivute okwa yelifa ta ti eshi oshi li eshongo linene la talelwa koshilongo shaashi ovanhu ovahapu va pumbwa ohonde, ashike kai po.
Shivute okwa ti ota indile oshiwana opo shiye momwaalu munene shi ka yandje ohonde shaashi oku yandja ohonde osha fimana unene osheshi ota shi xupifa eemwenyo dovanhu veli momhumbwe yohonde.
Okwa popya ta ti ohonde ei tai yandjwa koshiwana ohai kwafele ovanhu vena omikifi da yooloka ngaashi okankela, pefimbo oomeme tava pulumuna, omunhu ngeenge ta tandwa nosho tuu omikifi dikwao.
“Ehangano letu lohonde ola kwashilipaleka kutya keenhele adishe do kuyandjela ohonde okwa tulwa omilandu doCovid-19 noikwafifo ya wana yokukelela oCovid,” Shivute ta ti. Shivute okwa ti ovanhu vokonooli ovo vamwe vadidilikwa tava ende nakashona oku ka yandja ohonde.
Okwa popya ta ti ehangano lavo ola tameka nokuninga oshikonga meefikola opo ovanafikola navo va kufe ombinga va kale tava yandje ohonde.
Okwa popya omandiki ayeshe okuyandjela ohonde onghee nga tali twikile nokulonga efimbo keshe Omaandaxa fiyo etitano onghee oshiwana na shi kale tashi talele po omandiki avo ayeshe okuyandjela ohonde.
“Ngeenge owa i moipangelo paife oto hange muna ovanhu vahapu va pumbwa ohonde ndele kapena sha ohonde yokuyandja kovanhu veli momhumbwe,” Shivute ta ti. Shivute okwa ti omauyelele amwe elixwapo ohava yandje keeradio da yooloka do moshilongo nokomapandja avo okomalungula.
“Oshiwana na shi kale tashi topolalafane ouyelele kombinga yefimano lokuyandja ohonde opo ovanhu va kale vena eudeko la wana,” Shivute ta ti. Okwa kunghulila oshiwana opo shi twikile noku liufa komilandu edi da tulwa po dokukelela ombuto yoCovid-19 efimbo keshe ngeenge ovanhu tava ka yandja ohonde.
fhamalwa@nepc.com.na