Ombangaṋe motjiungura tjongamburiro ngandu tjongondjero yongutukiro yehi ovengi otja tji ve mu zemburuka okuza nganda aa wirire mOtjomuise tji ya ri 16 komueze mbwa zuko, ya tjirwa amai kumuka okuza mOmukutu. 

Okuyenda koye kOtjiuaneho tja Tjinene eye Osondaha mu ma suvisiwa. Kehi yombakero yohoromende ndje mu pe ondjozikiro yombakero yokotjiveta. Ndji ri ombangaṋe oitjavari okuza kOtjinene okupewa ondjozikiro indji, warwe aya ri Adolphus Kangootui, ngwa suvisirwe pOzombuzovindimba tji ya ri 15 komueze mbwa zuku, Oroviungura petjire Osondaha indi omuhonge Peter Katikisa nda ṱire. 

Kehi yohoromende pe nozombakero ndatu. Indji nai ndja pewa omuhohonge omuyaruke Tjijombo, ndji ri yokotjiveta, muyo omuyaruke ndje imbirwa ozohanga zotjikanona povikando hamboumwe. Ombakero yEhi ndji nozohanga o 17 na indjo yOmbangaṋe yozohanga o 21. 

Okuza komuhonge tja toorere ouyenda imbwi mbwa toorere, okuza mOtjomuise pombongo ye momurari imbwi oPKD Tjijombo ngandu kOtjiuaneho pomuvanda we, ya sanene korutjandjo rozombongarero inḓa motjiporotika nḓe tjiukwa otjozovimbumba, vombongo nozombongo, pekepeke tjinga eye mongamburiro aa nyamisisa kangamwa, ngandu kovatjiwasane mu mu novazapamwe moporotika tjinga wina mongondjero yongutukiro yehi eye ma kara norupa orutwe, ve mu pere ondjozikiro ndje mu pwire. 

Imwe yozondjozikiro inḓa ya zu mombongo oini indji Ofirst St John Faith Mission Church, oyo nambano ndja rire OFather Tjijombo St John Faith Mission Church. Pendje nomuhonge omunenene otjiuru tjayo oArchbishopa, eye wina ngwari otjiuru tjorupa rovita rwayo, tji tjiri otjimbumba tjozohiva, otjOmuhungirirepo wombongo, Ngahahe Tjiposa, tja raisa, “omuniovita” mombongo.