ONGWEDIVA - Omuhongi womukainhu moshiputudilo shaUnam Hifikepunye Pohamba (HP) Campus mOngwediva vati okwe lituwa onghela efimbo longula e limangelekela mongulufikola yaye.

Nakufya okwa tongololwa oye Ekning Nuusiku Shaanika weedula 56. Matolona Katrina Amakali-Ashivudhi ota ti okwa li hava di meumbo limwe naShaanika nohava nangala kwa li monduda imwe, ashike ina kala nande e na omadidiliko okulimangeleka. “Oshivike sha dja ko eumbo laye ola yaka omundilo wa etwa keengodi dolusheno. Omwa pila ashike omambo, oinima imwepo otwa endelela oku i tuta mo,” ta hokolola. Okwa ti nokudja opo Shaanika okwa ka dja meumbo limwe naye li li ashike popepi neumbo olo kwa li hadi tete. “Ina kala e na omadidiliko okulimangeleka. Otwa kala naye nombili. Okwa kala alushe ha penduka mokati koufiku ta tale omambo ovanafikola moseti nokushanga oinyangadalwa yaye,” ta ti.

Ashivudhi okwa hokolola ta ti Omaandaxa efimbo longuloshi Shaanika ina lya ashike okwa kala a mwena ta ti okwa loloka molwaashi efiku olo okwa li a twala otuwa yaye kongalashe. “Etivali efimbo lokeengulasha Shaanika okwa penduka mo monduda ngaashi naana shito ha penduka ta ka tala omambo ovanafikola. Lwopotundi 06h30 ounona vange ova penduka opo ve ke likoshe vaye kofikola nokonima naame onda penduka opo ndi likoshe,” ta hokolola.

Ashivudhi okwa ti efiku olo okwa li a limbililwa molwaashi Shaanika moseti kali mo onghee okwa ninga onghendabala yokudengela ongodi yaye ashike okwa li tai kwena i li moseti. “Onda kala handi lipula kutya oku li peni molwaashi alushe ohatu di mo oshita meumbo ngeenge hatu i koilonga,” ta ti. Okudja opo okwa tuma okaana kaye kokamati opo ka ka tale ngeenge Shaanika oku li kombelewa yaye ashike ke ko.

“Onda ya kongulufikola yaye handi mu kongo ashike onda hanga pa pata. Onda kala nda limbililwa kutya oku li peni molwaashi otuwa yaye inai pita mo mofikola,” ta hokolola. Okwa ti konima yefimbo okwa uda ovanhu tava popi kombinga oku kwaamena ongulufikola yaShaanika nomokushuna okwa didilika kutya mboli ovanafikola tava popi.

“Okudja opo onda hondamena momakende ongulufikola noku mu mona e li meemhango a fya. Onda shivifila ovanashilonga pamwe naame,” Amakali-Ashivudhi ta hokolola. Ovanashilonga pamwe naye ova tanga Shaanika ongomunambili, omukainhu e hole elandulafano noku na elongelokumwe navakwao. Ovahongwa ova ti omuhongi wavo okwa fiya po omwaka wa kula.

“Otwa kanifa omuhongi ha longo nondjungu. Shaanika okwa kala alushe he tu tu omukumo tu lihonge noudinini. Oshihongwa shaye kakwa li hashi dopwa,” omunafikola e li momudo omutitatu ta hokolola.Omukulunhu woshiputudilo sha-HP, Jacob Sheehama okwa ti ovanafikola moshiputudilo otava ka pewa omayakulo exungomwenyo.

fhamalwa@nepc.com.na