Festus Hamalwa
Omukulupe weedula 73 okwa ponokelwa nokudengwa shinyanyalifa meumbo laye moMondesa modoolopa yaSwakopkund Etivali mokati koufiku lwopotundi 02:30 Omupopiliko wopolifi moshitukulwa Erongo Inspector Ileni Shapumba okwa hokolola ta ti Dr. Sean de Jager okwa ponokelwa kookalyamupombo vavali mokati koufiku ndele tave mu denge.
Otaku fekelwa kutya ovafekelwa ava ovo Andreas David Gliso naKleopas Vetso ovo paife veliwe mokashoko kopolifi. Okwa ti vati omukulupe okwa uda omunhu ta konghola poshivelo sheumbo laye, nde ta penduka opo a ninge omapekapo omalinyengo ovanhu tava ngungutula pondje.
Opolifi oya ti omukulupe konima eshi auda omalinyengo ovanhu tava linyenge pondje okwa li eshi ookaume vokaana kaya ve u ya okutalela po mukwao. Omukulupe okwa hangika eli meumbo oyeeke shaashi vati okaana kaye okwa li ka katalela po koWindheok.
Sean eshi a patulula peumbo ovafekelwa vavali ove munukila ndele tava tameke okumudenga neengonyo, omanga umwe okwa kufa oshitenda osho a dengifa omukulupe momutwe.
Opolifi oya ti omukulupe okwa li a mangwa komaulu neengodi dolusheno kovafekelwa, omo ta ku kuhololwa vati kutya okwa li a pandekelwa moshipundi sha kula shili meumbo laye.
Konima eshi ovafekelwa va mangela omukulupe moshipundi ova kufa po eeshapi dotuwa, eeshapi deumbo, ongodi yopeke yomukulupe ndele tave mu patele meumbo nokushinga po otuwa yaye.
Otuwa yomukulupe oPolo itilyana ina onomola N1198R, omanga ongushu yoinima aishe kumwe ya kufwa meumbo kookalyamupombo efiku olo oili pongushu yoshimaliwa N$65 000.
Shapumba okwa ti omukulupe okwa ninga onghendambala opo elikufe mo meemhango omo kwa li a fiwa ndele ta pitile mekende lokandjuwo opo a kalopotele opolifi.
Sean okwa twalwa koshipangelo shaSwakopmund opo a kamone epango loapaunamiti lomendelelo shaashi okwa fika eli monghalo idjuu.
Opolifi oya ti omaliko omukulupe ina monika fiyo opapa, onghee opolifi oye lipyakidila nokukonga ovafekelwa shaashi ina va monika fiyo opaapa.
Shapumba okwa ti ku keshe ou ena ouyelele kombinga yovafekelwa kutya otava monika peni na kale a lopotela opolifi keshe ili popepi ile oshiwana shi kale sha lopotela Deputy Commission Erastus Iikuyu 0812464757 ile omukonakoni woimbuluma Chief Inspector Johannes Mwatongwe 0812461121.
Okwa ti omakonakono opolifi ota twikile.
Lopokati opo opolifi moshitukulwa shaMusati oya koleka efyo lomulumenhu weedula 21 a fya eshi a tuwa nombele kukaume kaye potundi 22h00 Etine pomukunda Omhumba Okafitu Kakama, moshikandjohoololo shAnamulenge moshitukulwa shaMusati.
Nakufya okwa tongolwa oye Kritof Tangi Ambambi omukalimo momukunda Omhumba Okafitu Kakama.
Omukonakoni woimbuluma wopolifi moshitukulwa shaMusati omupedu Commissioner Moses Simaho okwa hokolola ta ti Ambambi ova u wala nakaume kaye Etine efimbo lomutenya fiyo okonguloshi veli poundingosho.
Simaho okwa ti ovalumenhu ova ka tameka okutanguna efimbo lokonguloshi nokonima ova ka tameke
okulidenga.
Omufekelwa weedula 17 okwa kufa mo ombele yaye ei kwa li ahomata moshiya ndele ta tu Ambambi loikando ivali monulo nokuxulifila ponhele opo. Opolifi oya ti omufekelwa okwa faduka po eshi a mona kutya Ambambi okwa xulifa. Okwa ti omufekelwa okwa kwatwa po Etitano efimbo longula notakaholoka momhangu Omaandaxa. Ovakwapata vaAmbambi ova shiivifilwa efyo laye, nomudimba waye owa twalwa kokila yopolifi yaKahao. Simaho okwa ti omakonakono opolifi ota twikile.
Caption: Andreas David Gliso naKleopas Vetso otava kongwa kopolifi