Oministeri yOtutumbo nOvikunua, Omeva nOmatungururiro wEhi ya randa osarama imwe, Okroonkom Oitja-303 younene wozoheketara 6,270.
Ongooneya ya Kunene, Marius Sheya, Oritjatatu wa tjivisire nao mehungi re rombura aihe okuraisa kutja orukondwa rwa kara nomakeekawondjero wokomurungu kutja omombwiko yaro na wina monḓunino yovandu varo. Ovandu vetatu, omurumendu umwe novakazendu vevari okuza mOrukondua rwa Kunene va handurisiwa mosarama indji Okatjiuojo Oitja-244 mOrukondwa rwa Tjozondjupa. Ma tja omuano otjingewo ozosarama azehe kumwe omurongo za tjivisiwa kohoromende kutja i tare mu zo nani i ze randere omahundurisiro.
Ovature va Kunene otja tji ve hupa tjinene motutumbo novikunwa mbi kawondjera komeva wombura, tjinene ovinamuinyo, Orupa rwOuveruke wOvinamuinyo rwa uta ovitjitwa pekepeke vyokutjevera ehupo, okunyomona ouveruke wovinamuinyo na wina okunyomona omazemburukiro wovinamuinyo. Movitjitwa mbi mu na Otjingura tjOkuvatera Ovinamuinyo tji tja havara ape Ozondora za Namibia omangete 15. Wina okututumuna ongorongova yovinamuinyo, orupa ndwi nai ru notjiungura tjokuyerurura onḓengu yokatomeno ka Puwo. Posi omakawondjero wokomurungu ye otaotisiwa i youzeu wozondjo zomeva norutjeno okatomeno ku ke na zo. Mu nao oviungurisiwa vyomeva ovizikame otje ri ohepero kohoromende. Okutja opu pa karera ovitjitwa pekepeke vyoviungurisiwa vyomeva nomaungurisiro wawo. Mu vyo mu mwa toporwa ozondjombo 14 nu 11 zazo nḓa ri onḓoṋeno ngunda ndatu aze ha ri nomeva. Ine za toporwa mOkarukondwa kOmatoororero ka Puwo kOpendje pOtjivetjovakazendu, Okatumba kOutokero, Omitumbirua na pOruhozu ndja ri nokuhina omeva.
Yarwe ya toporwa mOkarukondwa kOmatoororero ka Puwo kOmotjihuro pOmaoipanga ngunda ndatu aza toporwa mOkarukondwa kOmatoororero ka Pupa pOkakondorokua, nopOkauapehuri na Otjandaue nḓe ha ri nomeva. Wina okunyomona omerikarekero mombwiko nokutunduuza onḓikameno movikurya okutuurungira mouṱuta womaṱunḓu, Oministeri yOtutumbo nOvikunua ya yandja engete komekurisiro wonḓengu yonyama yongommbe mozondendera zamunda mbwina nomukoka omuserandu. ON$950,000 zotjimariva hi tja ungurisiwa. Pu mape hee kokutja ozoperesende 96 zotjingura hi za manuka. Kombura yotjimariva indji 2023/2024 otjimariva tjarwe ape omangete yetatu nohinga tja yandjwa kotjiungura hi.