Festus Hamalwa

Omupopiliko mouministeli yeendjila noyeendifo Julius Ngwenda ota ti ondado yeelefa ita i ka wedelwa okutameka muNovomba ngaashi ovanhu tava popi. Meenghundafana a ninga naKundana Etitano Ngwenda okwa yelifa ta ti opena onghundana tai tandavelekwa komalungula kutya vati ondado yeelefa otai wedelwa ketameko laNovomba.

Okwa yelifa ta ti eshi ka shili mondjila nande shaashi fiyo opapa oministeli yavo ina i koleka opo ondado yeelefa i kale ya wedelwa. “Ohandi kunghulile ovashingi veelefa opo ve e shi yetekele okufutifa ovatwalelwa oshimaliwa shopomba shaashi oministeli yetu ina i shipitika natanga mango,” Ngwenda ta ti.

Okwa denga omufindo ta ti oku keshe omushingi ou ta kafutifa ovanhu oshimaliwa shili pomboda ota ka katukilwa onghatu yo paveta.

Okwa ti oshiima eshi na shi mone exulilo, shaashi osha nyika oulingilingi. Okwa hokolola ta ti ehangano loyeendifo yeelefa ola shangela omukunda kombelewa yavo va hala ondado i kale ya wedela vati shaashi ondado yomahooli nayo oya londa pombada unene.

Ngwenda okwa ti ovakunhuwiliki womominsteli yavo ina va ninga etokolo natango lili kombinga yokuwendela andado yeelefa.

Okwa hokolola ta ti ovakulunhuwiliki va kula opo manga tava ka ninga omutumba tava ka kundafana kombinga yoshikumungu eshi shokuwendela ondado yeelefa.

“Oshiwana xulife po oku kala tamu landula omauyelele oipupulu. Ngeenge opena sha shimwe mwa hala okupula kaleni tamukwatafana nopolifi ile mudengele keengodi detu opo mu kale mwakwashipaleka kutya omwa mona ouyelele womondjila,” Ngwenda ta ti.

Okwa ti ngeenge ondado otai ka wedelwa oshiwana shina oku shiivifilwa pambelewa koministeli yavo.

Okwa weda po ta ti ovashingi na veli ufe komwaalu wovanhu ou wa pitikwa oku kala wa londekwa. -fhamalwa@nepc.com.na