OSHAKATIS - ǀHaob ai di ge 29 malarias !nae!khaide Oshakatis di ǂHanusi ǀAeǁgâub tawa ǂoa ge kurib di Hôasoreb !nâ ge !nurihe. Ai!â gere ǂoa kurib di ǁkhā ǁaeb ǀkha i ra ǀgoweǀnōhe o, os ge nē ǀgaisa ǂharos hîa 25 !nae!khaidi ǀkha ǀarosen hâsa ǀkhamasase ra ǁgausen.

Nē mâsib ge ǁnā ǀaeǁgâub di ǀAe!khōs Superintendenti, Dr Ruben Kanimeb xa ge !khō!gâhe. ǁÎb gere mîse i ge nē 29 malarias !nae!khaidi hîa Hôasoreb !nâ ge !nurihede xu 22 !nae!khaide ǁnā ǀaeǁgâub tawa ge !âihe nauhâ hû !nae!khaidi ǀkharisi ǀaeǁgâuga xu nēǀî ge ǁnaeǁgauhe hîa. 

“ǀGui !aromas hîa nē !gôagu !nâ go hâ ǀkharaǀkharasiba a !aroma ǁkhās ge, !gâi ǀnanub hîa !oega nē kurib !nâ ǁnā ǀkharib !nâ ge ǁnāb xasa,” tib ge Kanumeba ge ǀaro. ǁÎb ge mîsa !oas ge ǂurusib ministerisa ǀnîkhamikō ǁkhaubas ǀgauga ge sîsenūtsoatsoa, malariasa ǂapaǂoasa ǁkhaes ase, aiǁgause om!nāb !nâ IRS soǀôa-e ǀiris khami. Nēs xōǀkhāb ge Kanimeba ǀhûhâsiga ra ǂgan î gu ǀhûhâsib ai !gao!gaosa ǂgaoǂgao!nâde ūhâ tsî ǂnamipeba !anuse ūhâs ai sîsen tsî ǁnās ǀkha ǀûtsin ra ǁoragu !khaiga ǀoroǀoro, ǂgaiǀons ai ǁūse gaxuse mâ tamas ka i o ǁgoe ǁgamgu, ǀuriba ǁaeb ai !anubē tsî hâ!khaiga hoaǁae !anuse ūhâs khami.

-Nampa

Kanimeb ge ai!â ǁanǂgāsabena ge ǂgan, in aitsama hâ ǁkhaubasens ǀgauga ôa-am, sao ran khami, ǀûtsigu ǁkhaubas netga sîsenūs, ǀirihe ra malariasa ǁkhaubas !aroma xūna sîsenū tsî gaxuǁgôa sarana ana tsî soresa ǁkhaubasen ǁkhā. -Nampa