Ongwediva – Omukeleli womaliko okwa kwatwa po konima eshi vati a vaka oikulya melimba lofikola noku i twala keumbo lomukainhu waye omanga vati mukwawo umwe okwa hangika a holeka oikulya keumbo laye koshi yombete.
Opolifi oya koleka tai ti omufekelwa umwe okwa hangika nale a tuma oikulya ngaashi ombelela noshako yolwishi nobesa kOutapi komukainhu waye.
Ovafekelwa aveshe ohava longele pofikola yimwe, nova kwatwa po Omaandaxa.
Oshiningwanima eshi osha ningilwa mexuliloshivike kosekundefikola Ekulo Secondary School efimbo loufiku lwopotundi 23h00.
Osekundofikola Ekulo Secondary School oi li modoolopa yaMuthiya moshitukulwa shaShikoto.
Commissioner wopolifi moshitukulwa shaShikoto Teopoline Kalompo-Nashikaku okwa ti opolifi oya kwata ko oikulya oyo ya hangika kOutapi konima eshi omufekelwa a yandja ouyelele kopolifi.
Ovafekelwa otava holoka momhangu nena notava pangulilwa oshibofa shoumbudi.
Eshi a kwatafana naKundana omukulunhufikola pofikola Ekulo Secondary Schoolo David Mushaandja okwa hokolola ta ti ova kala ve linekela ovakeleli vomaliko molwaashi ova longela po efimbo lile pofikola opo.
Okwa weda po ta ti omufekelwa umwe okwa longela pofikola opo oule weedula hamano omanga umwe okwa longela po eedula mbali.
Okwa ti alushe ngeenge ekulo la pata ohava fiile ovakeleli vomaliko eeshapi opo ve di yandje kovanailonga tave uya okutameka oshikofa yongula.
Mushaandja okwa yelifa ta ti ovakeleli vomaliko ova kufa eeshapi noku livakela mekulo ndele tava kufa mo oikulya ngaashi olwishi, ombelela noshuuka.
“Ongula eshi kwa sha ovanhu ve uya okutameka oshikofa lwopotundi 04h00 ova didilika kutya melimba lofikola omwa kufwa oikulya,” ta ti.
Okudja opo vati ova ningila ovakeleli vomaliko omapulapulo nokonima ova popya kutya ovo va kufa mo oikulya.
Okwa weda po ta ti mondjila yokuya keumbo lomufekelwa umwe omwe lituwa eembwa tadi li ombelela oyo ya vakwa.
“Ovakeleli vomaliko otwa kala hatuva pe oikulya mekulo yokulya oshuumbulululwa nouvalelo ngeenge ve li moilonga. Kakwa li tu shi ngeenge otava kwatwa komhepo yokuvaka oikulya mekulo,” ta ti.
Mushaandja okwa weda po ta ti omafimbo amwe ohava dulu nokufiila ovakeleli vomaliko eeshapi deetuwa davo shaashi ova kala ve va linekela neenghono.