Omukulunhu wopolifi moshitukulwa shaMusati okwa koleka ekwatopo lovalumenhu vavali ovo oshivike sha dja ko va li va patululilwa oshibofa molwefyuululo lihe li paveta.
Ovafekelwa vamwe, mwa kwatelwa omukainhu umwe oo inava kwatwa po natango. Ava vati ova nyekula po omaliko aeshe keefiye nomufiyekadi womumwainamati Abel Nandiinotya oo a xulifa muSepetemba womudo wa dja ko.
Opolifi oya ti ovafekelwa ova fyuulula po omaliko ngaashi eetuwa mbali, eedi, eendoongi, oikombo nosho tuu omaliko amwe po a yooloka.
Omaliko a fyuululwa po oku li pongushu yoshimaliwa N$748 300.
Opolifi oya hokolola tai ti omufiyekadi okwa li a shangifwa momambo komushamane waye opo a kale a fyuulula po omaliko ayeshe nounona vaye ashike oosuwala shaye inave shi panda.
Eshi a kwatafana naKundana nomufiyekadi Albertina Amukwelele okwa hokolola ta ti konima yefyo lomushamane waye okwa kala nokuhepekwa kofamili yomushamane waye, ya kala tai mu ningile omatilifo oku mu dipaa.
Okwa ti paife okwa kwatwa koudu wohonde ya londa molwaashi tava hepekwa komadilaadilo nokoluhepo.
“Onda tewa mo meumbo koosuwala shange. Eumbo ove li pata nomakumba, ounona vange vatatu navo ova tewa mo meumbo,” Amukwelele ta hokolola.
Okwa ti paife okwa ninga eumbo laye omo paife hadi mo nounona novatekulu.
“Onda fiwa pomutenya, omaliko ayeshe okwa fyuululwa po. Okwa li twa tula omaliko mumwe nomushamane wange,” ta hokolola.
Okwa weda po ta ti oosuwala shaye ova ti kutya eumbo otali pewa po umwe womutekulu vaNandiinotya.
Onghee naashi osha eta opo a ka patulule oshibofa kopolifi opo a popilwe komhangu yopombada.
Umwe womudalwa Niita Nandiinotya okwa hokolola ta ti kave udite ombili eshi va tewa meumbo laxe shaashi paife otava mono oixuna.
“Ofamili yatate oya ninga epuko lakula, eumbo okwa li tu na oku li pewa po shaashi ofye ovadalwa. Ohatu indile omhangu yopombada opo i kale ya ya mo eenyala moshikumungu eshi shaashi fyee otwa haka ouyuuki,” ta ti.
Eshi a kwatafana naKundana Saara Iita ou e li omumwainakadona waNandiinotya, okwe likala oshikumungu eshi omo a hokolola ta ti ye ina fyuulula po omaliko.
Okwa ti opolifi yomoshitopolwahoololo Omusati itai longo pauyuuki shaashi vati ova kwata po vamwainamati pehe na ouyelele woshili.
“Amukwelele na popye oshili, kape na omaliko a fyuululwa po. Omaliko ayeshe oku li keumbo lomushamane waye,” ta ti.
Okwa weda po ta ti pefimbo Nandiinotya e li momwenyo ova kala nale va topoka nomukulukadi waye konima eshi Nandiinotya a tulila mo omukulukadi waye oshinano komhangu shokukala a dja mo meumbo laye.
Okwa ti Amukwelele meumbo okwa dja mo omudo wa dja ko muMaalisa noku ka ninga eumbo laye.
“Amukwelele okwa li ashike e ya keefya. Inava hangika va teya ohombo ashike okwa hangika meumbo a tewa mo kuNandiinotya,” ta ti.
Okwa weda po ta ti ounona navo ova hangika meumbo va tewa mo kuxe.