Festus Hamalwa

Ovanambelewa vopolifi vatatu ova monifwa oshiponga eshi va dengwa kovakwashiwana vaZambia Etivali efimbo longula keengamba daNamibia naZambia kOkatima Mulilo moshitukulwa shaZambezi.

Konima eshi ovapolifi va dengwa ova twalwa koshipangelo shepangelo shaKatima Mulilo opo va ka mone epango lopaunamiti.

Oshiningwanima eshi osha kolekwa komupopiliko wopolifi moshitukulwa shaZambezi Inspector Kisco Sitali eshi a hokolola ta ti ovakwashiwana vaZambia okwa li vangudumana keengamba efimbo longula va hala okuya modoolopa yaKatima Mulilo opo va ka ninge omangeshefelo avo modoolopa.

Sitali okwa ti ovanailonga vokeengamba okwa li tava tula po elandulafano kombinga nghee ovaZambia vena okukala ve u ya moNamibia, ashike ka kwali va hala okulandula eshi tava lombwelwa konavambelewa.

Vati naashi osha ka eta opo ovaZambia veli pume mumwe novanambela vokeengamba ndele tava u fana opolifi opo i kale ya fike okutula po elandulafano.

Sitali okwa ti konima eshi opolifi ya fika ovaZambia ova tameka okukupula omamanya ovanambele novapolifi ovaNamibia vatatu ova ehamekwa. Okwa popya ta ti efiku olo opolifi yaNamibia oyeshi pondola okukwata po ovaZambia veli vatano ashike vamwe ova faduka po va u ka moshilongo shavo.

Okwa ti eshi ovaZambia vakwatwa po va kala veli moipandekelo yopolifi efikulo ashike ova kamangululwa konima eshi ovanambelewa va kula vaZambia veke u ya opo vakundafane lopolifi yaNamibia kombinga yoshikumungu eshi. Opolifi oya ti kapena omuZambia a nangala modolongo yaNamibia ile a pewa ehandukilo lokufuta oshimaliwa konima eshi va mangululwa.

OvaZambia okwa li valondwelwa kovanambelewa vavo va dja koshilongo shavo opo va xulife po okukala tava lwifa opolifi yaNamibia shaashi osha nyika oshiponga neenghono. Ovalombwelwa kutya ku keshe ou ta ka monika talwifa ovanambelewa vokeengamba ile opolifi yaNamibia ota kala a pewa ehandukilo lopaveta.

Sitali okwa ti okwa didilikwa ovaZambia ve hole okumbolokotela moNamibia tava dilile kodoolopa yaKatima Mulilo opo ve u ye okuninga oipindi yavo ngaashi okulandifa oikutu, eenghaku, eetuwa nosho tuu oilandifomwa ikwao ya wedwa po.

Okwa ti ovaZambia vahapu ka vehole vali okushuna koshilongo shavo kinima ngeenge ove u ya moNamibia, vati ova kala tava ningi omangeshefelo ndele iha futu oishoshela yokongulu. Naashi osha eta opo ovanambelewa vokeengambo opo va kale veli oupafi alushe ngeenge ovaZambia tave u ya moNamibia.

Sitali okwa kunghulila ovaNamibia novaZambia opo va kale vane ombili nelongelo kumwe. – fhamalwa@nepc.com.na