Kae Maṱunḓu-Tjiparuro
Mba perwe okaruveze kokutara membo ohunga nomuinyo womuyaruke ohahende Ombara Otjitambi yOvaherero, Vekuii Rukoro va i kumwe, mari yata nokuṱuna kovihando vye pekepeke.
Mu mu nOutuiuozonḓu eye tjinene ma toorera otjivepo tjoporotika. Otjo tji tja pukapukisiwa i yongaro yondjindiro yOvazoozu. Nonḓero yokurira ohahende, otjotjihorera tjovarwire vongutukiro mOsouth Afrika tjimuna Oliver Tambo na Nelson Mandela. Posi ya oruveze ndo aya ri ouzeu Omuzoozu okurihonga komurungu tjinga atji ha ri otjipaturukire kOvazoozu okurihongera moviungura. Rukoro tja mana osikore pOutuiuozonḓu otje rikuta konganda yozohahende Olorentz and Bone okurihongera moviungura. Oyo oruveze ndo ndja ri yOvavapa uriri. Posi ya atji he mu tirisa. Wina ozombura nḓo o 1970 kazari ozombupu mOswanu eye ma hita narire Omutjangerepo wayo amu nyangatara tjinga ovanane tjiva mbari pendje ava uta okukotoka nu kaṱiṱi oyo ai utu okuteratera mongamburiro yayo.
Posi ya Rukoro kanaa wa teratera nouṋingandu omuyaruke Gerson Hitjevi Veii wa pandurwa motjovakamburwa tjoporotika tja South Afrika mOkaverua ka Robben na kambura kombaikiha ye.
Ovatjange Onongo Rukee Tjingaeṱe na Vitura Kavari Oritjatatu nda zuko otji va tjiukisire embo ndu va tjanga ohunga nomuyaruke Rukoro. Ozonongo Uazuva Kaumbi na Rihupisa Kandando na Muvatera Ndjoze-Siririka mu va tarere membo ndi nave i kumwe kutja mari twa po Rukoro ondota moviṱo pekepeke ma yata.
Kandando ama tja eye ookumuna momambo omengi nga tjangwa ohunga nominyo nomakarero wovandu pekepeke, ndi mari yarura po omundu tjiri otja tjaa tjiukwa poo koviṋenge kaatjiukirwa. Mu mu nokupanḓera komuyaruke Rukoro ngwa kara moporotika yehi ndi orure nu aha piti mehi a kondjere muro tji ma kapita tjandje ya karira ozombura inḓa o 1980.
Ngunda ape ri nao pe novanatje tjiva mbu mave munu kutja imba mbe ritjanga kambe ri vo tjinga ave ha vanga ihe.
CAPTION: Embo ra tjiukisiwa…Ohunga nomuinyo womuyaruke ohahende Ombara Otjitambi yOvaherero, Vekuii Rukoro. Motjiperendero itjiva votjikutu tja Rukoro.
Picture: OTJIKUTU
Omuperende: Kae Maṱunḓu-Tjiparuro