Festus Hamaklwa

Minista youhaku nonghalo nawa Dr Kalumbi Shangula okwa ti nonande omwaalu wovanhu tava kwatwa kombuto yoCovid-19, osha fimana ngeenge ovaNamibia tava twikile okuliufa komilandu doCovid-19.

Shangula edi okwe dipopya Etitatu moWindhoek pefimbo kwa li ta tambula ko oikwafifo yombuto yoCovid-19 ya yandjwa koUK oshowo.

Shangula okwa popya ta ti ovaNamibia nava kale veli longekidila ekufikufi etine loCovid-19. Okwa popya ta ti paife onghalo otai ende yauka kouwa shaashi moshilonga kamuna sha vali omwaalu muhapu u li pombada wovanhu vakwatwa komukifi ou.

Okwa yelifa ta ti nomafyo ovanhu va fya koCovid-19 okwa shuna pedu paife mokufaafanifa ngaashi sha kala shito.

“Ovanhu nava twikile okudjala oumaska vavo, pomandiki omangeshefelo na pa kale pena eefewa nomilandu doCovid-19 da tulwa po efimbo keshe,” Shangula ta ti.

Efiku tuu olo Shangula okwa popya ta ti okwa pandula ovanailonga voundjowele eshi va kala nokulonga noudinini tava u ngaunga novaudu vakwatwa koCovid-19 moipangelo.

Okwa kunghulila ovanailonga voundjolowele opo vatwikile nokulonga nondjungu efimbo keshe. “Mopaife moipangelo nokomandi ouhaku kamuna sha vali omwaalu muhapu wovanhu tava vele oCovid-19 shaashi onghalo otai ende yauka kouwa paife,” Shangula ta ti.

Minista Shangula okwa denga omufindo ta ti oministeli youhaku onghee nga natango tai kungulile ovanhu opo va katunhilwe ombuto yoCovid shaashi eshi otashi shunifa etandavelo lombuto pedu.

“Osha fimana ngeenge omunhu a tunhilwa shaashi oha kala eli meameno la wana nokukala yo vali amena vakwao,” Shangula ta ti.

Minista okwa ti ovanhu nava kale tava topolafane ouyelele kombinga yefimano letunhilo loCovid-19 shaashi eshi osho omukalo muwa wokuxwaxwameka oshiwana opo shi kale shina ohokwe okutunhilwa.

“Natu longeni kumwe opo tu dule okukondjifa ombuto yoCovid-19 moshilongo,” Shangula ta ti. – fhamalwa@nepc.com.na