EPEMBE - Omupeviminista gwelongo Faustina Caley okwa li a holola euvunayi sho a mono omwaalu ogundji gwaalongwa yaa na oongaku dhosikola posikola Ondulundiya moshitopolwa shaHangwena oshiwike shika.

Aalongwa ya thika 500 posikola Ondulundiya oshowo poHifikepunye Pohamba Combined oya taalela onkalo ondhigu unene pethimbo lyuutalala, oshowo ethimbo lyomutenya ndjoka twa taalela, sho taya ende iinano iile oompadhi kowala. “Otashi etitha ohenda okutala aanona mbaka yaa na oongaku, omanga taya hiti ootundi pethimbo ndika lyuutalala. Onda kwatwa komadhiladhilo goku Tim Ekandjo gwo-MTC opo a idhope mo,” ta popi ngaaka.

Caley okwa indile aanangeshefa oshowo omahangano gi li nogi ili opo ga kale taga yambidhidha aalongwa noompumbwe dhawo, nelalakano lyoku ya pa omukumo okuya koosikola. 

Ekandjo esiku ndyoka okwa li a zimine kutya naye onkalo okwe yi mona, ihe otaka kutha onkatu okukandula po uupyakadhi mboka. “Oshiwike sha zi ko onda yambidhidha aalongwa posikola yimwe moshitopolwa shaHangwena noongaku dhosikola dhi vule 300. Sigo onena onda yambidhidha aalongwa ye vule 8 000 moshilongo nuumvo ashike,” ta popi ngaaka. 

Okwa li afatulula kutya elalakano okuyambidhidha aalongwa ye li 10 000 kehe omumvo. Oproyeka ndjoka okwa li ya totwa po ku Ekandjo ye mwene, nelalakano lyokukaleka okanona Okanamibia mosikola, konima a li a ndhindhilike omashongo ga talela aanona yosikola moshilongo yaa na oongaku dhosikola.

Omukuluntusikola posikola Ondulundiya Justine Shinana esiku ndyoka okwa popi ta ti oshoka otaya vulu okuyambidhidha po ashike yamwe, itaye ya gwanitha, ohaya kumagidha ashike ya taambe ko onkalo. 

“Ohandi ya kumagidha ashike ya kale taya tondoka okuya kosikola, opo kaya uve uutalala oshowo uululume womamanya, unene mboka haya ende oondjila oonde,” ta popi ngaaka.

Omukuluntusikola posikola Hifikepunye Pohamba Petrus Shikongo okwa ti, oyendji posikola yawo kaye na oongaku ndhosikola.

“Onkalo ndjoka otayi etitha ohenda ihe katu na nkene tu na okuninga. 

Ethimbo lyongula oto adha aalongwa yamwe ya ontela ontenya oshoka oyu uvite uutalala,’’ ta popi ngaaka. 

Ta ti, nonando ya kala nokwiindila aakaluntu ya lande oongaku, aashona ashike yomuyo ye na.

Ta gwedhapo ta ti, pakutala owu wete kutya aalukuntu oya hala okuyambidhidha aanona yawo ashike oya nyengwa.

“Otatu indile moshigwana kehe ngoka ta vulu okuyambidhidha aalongwa yetu, e shi ninge nondjungu, otatu pandula noonkondo,’’ ta ti ngaaka.   

Onkalo yaalongwa kaaye na omizalo dhosikola moosikola dha yooloka moshitopolwa shaHangwena, otayi ende tayi dhigupala sho aalongwa ya tameke okutinda kosikola.  

Gumwe gwomaalongi posikola Ondulundiya okwa ti, aanona poosikola odhindji moshitopolwa kaye na omizalo dhosikola dhi ihwa po, omolwuunyengwi oshowo oluhepo. 

“Otwa kala nokukambadhala okukumagidha aavali ya zaleke aalongwa omizalo dhosikola dhi ihwa po, ashike oyendji otaya nyenyeta kutya kaye na iiyemo, onkene itaya vulu okugwanitha po omizalo dhaanona yawo,” ta hokolola ngaaka.

Ta ti, nonando oosikola dha kala nokutula po omilandu kutya aalongwa oya pewa ashike sigo esiku lyontumba ya kale ya zala omizalo dhi ihwa po, nelalakano lyokutsa omukumo aakaluntu, shoka osha kala hashi shololitha aalongwa. “Aalongwa okwa li ya tameke taya faula ootundi, netompelo anuwa sho kaye na omizalo dhi ihwa po,” omulongi ta popi ngaaka.

Ta ti, otashi yematitha, oshoka mboka kaaye na omizalo dhi ihwa po, oye uvite kutya inaya faathana nenge kaye thike pamwe naamboka ye na. Aalongi moshitopolwa shaHangwena otaya indile aanamutimahenda, opo ya yambidhidhe aalongwa mboka nomizalo dhosikola. 

Kehe omunona okwa pumbwa elongo, ihe ote li mono uuna e li mosikola. Onkalo yili ngaaka otayi shololitha aalongwa, nomonakuyiwa otashi vulika ya ka thige po oosikola.

Omulongi ngoka okwa popi kutya yamwe kaye na oongaku, ihe shoka itashi shololitha ashike ihe otashi vulu wo okweeta omikithi mokati kaanona. 

“Onkalo otayi yemateke nokweetitha olukeno.  

Oomwenyo dhetu ongaalongi nadho kadhi kala dhi na ombili ngele tatu longo, sho twa tala aanona yetu ye li monkalo yi li ngaaka,” ta ti ngaaka. Natango okwa fatulula kutya onkalo ndjoka ohayi nkundipaleke wo omadhiladhilo gaalongwa, kaaya kale ya itulamo meilongo lyawo. 

Ta ti, osikola yawo otayi ka pandula kehe ngoka ta ka yambidhidha okugwanitha po oompumbwe dhaalongwa  yawo. 

vkaapanda@nepc.com.na