Vyotjiṱiro Otjindjandja Ovyotjiṱiro Otjindjandja, ya zepaisa omuhoko auhe kutja owOvaherero poo Ovambanderu munao otji vya sere okuzemburukwa pondondondo yomuhoko auhe. Ombara Onene yOvaherero nOmuhaamise wOvihavero vyehika rozombara za Kandjoze zOvaherero nOvambanderu, Tjinaaṋi Maharero, wa twa po omuhunga mbwi otja kondyero yaavehe pamwe otjozombara kehi yehika indi. 

Eye omuhunga mbwi we u raisire nokuuhandjaura kotjiwaṋa mOtjozondjii omayuva wOkambo Konḓiro, Epaha ra Tjiute tji ra tukumukurire kouye womeva okuteza ozondambo zovaṱi novakuru varo imba mbe hi nehuno rozomaṱupa nga nyangatara kutja omukuti onguza kwa Namiba na wina tjiva vao vomaṱupa wawo nga karira ovikurya vyomahundju momuronga na momakuvare, oturova twavo tji va ṱire mu rumwe rorumbo rwa Kandjombonḓi rwa Tjozondjii aave umbwa nave rire ovikurya vyovipuka vyomomuronga nokuvare.  Otjomautiro wondando nomuhunnga mbwi ozombara zehika ra Kandjoze, oro ndi ri ehika rozombara zOvaherero nOvambanderu nḓe nongamburiro imwe mokutja Otjiṱiro Otjindjandja matji sokurwisiwa neraka rimwe, za karere pamwe mOtjozondjii. Posi ya aze ha kara nohange kutja ozo porwe amaze rizemburuka kutja Otjiṱiro Otjindjandja tjOvaherero nOvambanderu katji yandererere puwo uriri nungwari pe nozondekurona ozongwao zarwe nḓe hungira otjiṋa tjingetjo momirari nomiriu vyarwe. 

Tjeri ohepero kutja avehe pamwe ve hungirire momuriu nomurari umwe.  Ama tja nai tja sewa komarapi oyeni okuriṱuna nokupaha omuano mbu maye riṱunu kokutja tjii hapo tji kwe ya kokuzemburuka pamwe Otjiṱiro Otjindjandja oyo maye riṱunu vi nu povitjitwa mbya tjama nOtjiṱiro Otjindandja maye ritjindi vi?  Ohamakari, Otjihenḓa, Ozombuzovindimba, okuhakura ko tjiva vyovitjitwa mbya tjama na mbi notjiṋa nOtjiṱiro Otjindjandja, otjiwaṋa mbi tja sere okusekamena tjimwe otjomundu umwe natji zemburuka pamwe. Otja kOmbara Onene Maharero ombura ndji ovitjitwa ovo mbi va tanda na mu ve nonḓero kutja mavi sokurira ovitjitwa vimwe mbi mavi zemburukwa i yomuhoko auhe pamwe meyuva rimwe ndo, ndi mari kekwa.  

Okuutira mu Kambundu tji ye ri 28 ndi ri eyuva nda kekwa Otjeyuva rOtjiṱiro Otjindjandja.  Otjiwaṋa ombura ndja zuko ndi tja utire okuzemburuka pamwe.