Minista woukashikekookanhu nonghalonawa yokaana, Doreen Sioka okwa ti ombelewa yaye itai popile omahepeko taa ningilwa ounona, onghee okwa kunghilila oshiwana opo shi xulife po okuningila ounona omahepeko omomaumbo.

Sioka okwa ti okwa kumwifa koshiningwanima shinyanyalifa shokaana kokakadona keedula nhano ka dengwa omuhanga kounona vakwao noshoyo kuina omwedi wa dja ko modoolopa yaGobabis.

Oshiningwanima shokaana taka dengwa oshe uya kombada konima eshi okavidio ka andjenekwa komalungula.

Minista okwa ti osha puka okuhangakena okaana kashona, onghee ina yokaana oye kwa li e na okukala a lombwela vakwao va xulife po okudenga okaana.

Okwa ti otashi ulike efano lii moshiwana shokaana keedula nhano taka hangakenwa kounona vatatu nokuina.

“Ovadali nava amene ounona wavo. Oshi li oshinakuwanifa shomudali opo a kwashilipaleke kutya okaana kaye oke li mefiloshisho la wana,” minista ta ti.

Sioka okwa weda po ta ti ounona vahapu ova ninga oihakanwa yokuhepekwa momaumbo molwaashi ovadali va dopa okutonatela ounona wavo.

“Inandi hala vali okuuda okaana taka ningilwa omahepeko omomaumbo. Omunhu keshe ta ningile ounona omahepeko otaka katukilwa onghatu yopaveta shaashi osha puka,” ta ti.

Minista okwa kumaida oshiwana shi longele kumwe nopolifi, omalelo opamufyuululwakalo novafitaongalo okukondjifa omahepeko oukashikekookanhu momidingonoko davo.

“Omunhu keshe ta hepeke ounona na lopotwe. Oshiwana nashi xulife po okuamena ovakwapata vavo ngeenge tava hepeke ounona momaumbo,” ta ti.

Omukulunhu koshikondo shokukonakona oimbuluma moshitukulwa shaMaheke, omupedukomufala Chris Kalimbula okwa koleka ta ti opolifi oye lipyakidila nokuninga omakonakono kombinga yoshikumungu eshi shokaana ka dengwa omuhanga.

Okwa weda po ta ti fiyo opapa ka pena oshibofa sha patululwa.

Xulifei po okuhepeka ounona... 

Minista woukashikekookanhu nonghalonawa yokaana, Doreen Sioka.

Efano: Otwe li pewa