Omupopiliko welelo laUkwanyama Andrew Naikaku okwa kumaida oshiwana moshitunda shaUkwanyama opo shi xulife po okufitika eendjila odo da i kiwa okuendwa kovanhu.
“Otashi teya po ombili momikunda nokueta eenamanana pokati komaumbo,” ta ti. Okwa ti eendjila dimwe oda kiwa okulongifwa kovanhu molwashi oda kala po efimbo lile.
Pefimbo va ninga eenghundafana naKundana onghela Naikaku okwa ti ombelewa yaye oya didilika ovanhu tava nyenyeta kombinga eendjila da fitikwa.
“Omunhu oha kala e na otuwa ashike ngeenge ta shingi auka pondjila yonhumba ota hange ya fitikwa kumwene weumbo,” ta ti.
Okwa ti oshiwana nashi lopotele eembelewa doovene vomikunda ngeenge shina omapyakadi.
Okwa lombwela oshiwana opo shi kale nombili noukumwe momikunda davo ndele ha ku tanguna.
“Alushe ohatu lombwelwa kOhamba yetu yaUkwanyama opo tukaleni nombili,” a weda po.
Naikaku okwa ti itashi ulike efano liwa ngeenge moshitunda shaUkwanyama muna ovanhu vahe na ombili.
Okwa lombwela oshiwana opo shi li longekidile efimbo leedima molwashi odula oya tameka okuloka nale.
“Ovanhu na va ngabeke efimbo lokuya keendingosho molwashi otwa taalela efimbo loilonga yomomapya,” ta ti.
Naikaku okwa ti elelo laUkwanyama ola tula po omilandu kombinga yeevili dokupatulula eendingosho.